COOPERSTOWN, New York: E pelotero di mas hoben, cu a conecta un homerun den World Series na aña 1996,
na e edad hoben di 19 aña, conoci como ‘The Curacao Kid’, esta Andruw Jones a drenta Hall of Fame di Atlanta Braves.
Den henter su carera, e legendario pelotero Andruw Jones a gana 1 Silver slugger award. Na tur el a gana 10 Golden Glove Awards, el a sali MVP runner-up cu un cantidad di 434 homerun durante 17 temporada, tambe 5 biaha a participa den All Star.
Andruw Rudolf Jones sigur a habri porta pa varios pelotero di e islanan aki banda, y ta wordo inclui awor den buki di historia como un di e mihor peloteronan di Curaçao y Caribe.
El a nace dia 23 di April 1977 na Curaçao, y su feliz mayornan tabata Henry y Carmen Jones. Su tata mes tabata e coach di mas importante, y cu 11 aña di edad el a wordo escogi pa un seleccion hubenil cu a bay hunga na un torneo na Japon. Despues el a sigui desaroya den un di e top hungadornan hubenil na Curaçao, y por a hunga na diferente posicion debi na su braza poderoso. Na aña 1993 el a wordo descubri door di un coach di Atlanta Braves. El a bira conoci pa su cualidadnan defensivo den outfield, y su power-hitting na homeplate.
E wega mas memorable di dje, ta den e 1er competencia di World Series na 1996 ora cu Atlanta Braves a topa New York Yankees na New York. Aki Andruw a conecta den su prome dos turno na bate, un homerun. Cu esaki, el a bira e pelotero di mas hoben cu a conecta un homerun den un World Series.
https://diario.aw/categories/noticia/general/andruw-jones-di-curacao-a-drenta-den-hall-of-fame#sigProId3e8ccead6f
