Prome Minister mustrando cu e Sindicatonan ta hunga un papel importante pa Gabinete Wever- Croes II

ORANJESTAD (AAN):  Diaranson 20 di juli a continua e reunionnan cu stakeholders den nos comunidad en cuadro di formacion di Gabinete Wever-Croes II. E prome area di e reunionnan diaranson tabata cu sindicatonan. A reuni cu 8 sindicato: SEPPA, TOPA, SIMAR, SADA, SPA, SINBA, STA y FTA.

            A base di e reunion aki por a scucha kico pa e sindicatonan ta importante pa gobierno tene cuenta cu ne den un acuerdo y periodo di gobernacion nobo. Nan a trece puntonan dilanti cu ta regarda nan miembronan y Aruba en general. Nan enfasis ta riba e bienestar y posicion di e trahado.

            Tambe a reuni cu Comerciantenan Uni Aruba (CUA) y cu SETAR. Ambos cu e miranan riba desaroyo economico y kico CUA ta considera di ta di importancia pa e empresanan mediano y chikito na Aruba. SETAR a duna nos su vision y con nan ta bay atende cu e cambionan grandi y lihe den tecnologia den futuro y mantene e compania como un compania cu ta keda haci ganashi y draai stabiel pa por duna e servicio adecua.

            Riba e tema di Salud, a reuni cu Fundacion Maneho di Adiccion Aruba (FMAA) y Sociaal Physchiatrische Dienst (SPD) y a delibera cu nan riba e problema di salud mental.    Siman pasa a papia cu Respaldo cu ta e cuido specialisa den cuadro di salud mental. E dos organisacionnan aki a presenta un vision con nan lo por traha hunto y bringa e problemanan mental cu nos tin aki na Aruba. Nan a conta tambe kico tur nan ta haciendo caba especialmente SPD cu ta atende esnan cu haya nan den cualkier problema di salud mental den famia of cu pashentnan y con nan ta atende cu esaki. Nan a entrega un presentacion hopi profesional.

            Cu e asociacion di dentistanan na Aruba, Aruba Dental Association a scucha di nan banda con nan ta mira e desaroyonan y a expresa nan preocupacionnan riba e gastonan di cuido dental ya cu no ta tur cos ta wordo cubri pa AZV y kico ta e futuro pa e area aki y pone cuido dental mas halto riba lista di prioridad di cada cuidadano.

            Esnan presente den e reunionnan tabata: CUA, Francis Saladin; FMAA, Randall van Trigt; SPD, Dargis Montalvo; SIMAR, Josephine Albertus; SPA, Rodney Solognier; SADA, Eduard Maduro; STA, Diego de Cuba; FTA, Hubert Dirksz; SETAR, Roland Croes y ADS, Marielle Ho-Kang-You.

            Despues di cada seccion di 45 minuut cu Prome Minister Evelyn Wever-Croes y Lider di RAIZ Ursell Arends, cada representante a haya turno pa duna nan declaracion na prensa y duna e oportunidad pa prensa haci pregunta.

            “E di 4 dia di e reunionnan cu stakeholders den cuadro cu formacion di Gabinete Wever-Croes II tambe a bay bon. Hunto cu RAIZ nos a tene e reunionnan aki entre e integrantenan di ambos partido y nos a haci diferente palabracion pa continua cu e diferente stakeholdernan aki unabes e Minister encarga ta apunta”, Prome Minister a duna di conoce.