ORANJESTAD (AAN): Gisbert Boekhoudt, director di Directie Natuur en Milieu hunto cu Marc Oduber, Director di Meteo a relata riba e reunion cu tabata tin cu Formador di Gobierno Evelyn Wever-Croes.
El a bisa cu nan a combersa riba cambio di clima y e peligernan cu por tin pa Aruba y kico por haci pa percura cu por atende cu esaki adecuadamente.
Boekhoudt a splica cu e riesgo pa Aruba como isla cu ta depende di locual ta di lama manera awa di yobida, di e turistanan cu ta bin pa solo, e naturalesa y e servicio cu nan ta haya, e cambio di clima ta bay tin un impacto riba esaki.
E impacto pa Aruba, con severo esaki ta, pa esaki a puntra pa institui e comision pa atende cu esaki. Mester genera mas dato y mas informacion pa yega na un maneho mas structural pa Aruba por atende cu cambio di clima.
Na otro parti di mundo e cambio di clima ta conoci caba y por ehempel, siman pasa por a tuma nota di e ola di calor na Merca y Canada, e inundacion na Alemania, Belgica y Hulanda como tambe na China.
E sistemanan climatologico ta algo cu nunca antes algun di e paisnan aki no a wak den hopi aña.
Ta bay tin cambionan no anticipa, pero cu pa medio di ciencia kier wak dilanti y pone mas den bista pa atende cu esaki mihor, Gisbert Boekhoudt a remarca.
