*E capacidad pa dialyze mester wordo aumenta - ORANJESTAD (AAN): Segun Edwin Jacobs, directo di Banco di Seguro Social (SVb) como tambe director interno di AZV,
aworaki tin un calculo di gastonan cu ta sali for di e aspecto di envehecimento di e poblacion, pero esey ta un calculo cu ta sali for di un metodo cu ta hopi global.
Pa loke ta trata structuracion di e cuido ta necesario haci un proyeccion cu e 5 malesanan mas comun, por ehempel. E ta pone por ehempel e caso di dialyze.
Na Aruba tin 230 pashent cu ta asegurado cu ta haya dialyze. E aña aki mester a haci apelacion na ImSan pa habri un warda mas pa por atende e cantidad di pashent. Si esaki no a sosode lo mester a manda afo 6 pashent pa haya nan tratamento, Jacobs a splica.
E proyeccionnan rapido cu a haci ta mustra cu e 230 pashent aki ta bay bira 350 na 2030. Kiermen cu e capacidad pa dialyze mester wordo aumenta.
Ta bay haya esaki como un parti di e cuido cu tin cu bay structura pa por yega na e demanda.
Locual ta bay haci cu e cuido di e prome linea di docternan di cas? Tin un proposicion di e Asociacion di Docternan di Cas (HAVA) cu ta spera di por sigui pasobra e ta un fortificacion di e linea ey, a enfatisa.
Segun Jacobs, asina tin cu bay identifica e tipo di malesanan cu ta bay predomina na final di añanan 2030 y a base di esey ta structura e sistema di cuido.
