ORANJESTAD (AAN): Na su yegada na Sint Maarten, diadomingo Prome Minister Mike Eman a ricibi un bonbini caluroso di un grupo
di e miembronan di Chuchubi Foundation na Aeropuerto Internacional Princess Juliana. E fundacion, cu ta activo na Sint Maarten for di 2003, ta dedica su esfuersonan na fortalecemento di e relacionnan cultural y social entre Aruba y Sint Maarten.
Chuchubi Foundation a wordo funda dia 1 di april 2003, cu e obhetivo di promove interesnan cultural, social, economico y general di su participantenan na Sint Maarten y Aruba. Desde su fundacion, e organisacion ta dedica atencion na actividad educativo, cultural y social, mientras cu e ta contribui na fortalecemento di e relacion entre e dos comunidadnan.Un di e caracteristicanan di Chuchubi Foundation ta su reconocemento na personanan y organisacion cu ta contribui positivamente na desaroyo di comunidad di Sint Maarten. For di 2003, e fundacion a honra diferente Arubiano y otro persona cu nan contribucion den enseñansa, deporte, musica, cultura y trabou social a laga un impacto positivo.
E bonbini na Prome Minister Mike Eman ta resalta e importancia di e comunidad Arubiano na Sint Maarten y e papel cu e organisacionnan comunitario ta hunga den preservacion di e lasonan entre nos islanan.
Kingdom Summit y reunion ministerial na Sint Maarten
E bishita di Prome Minister Mike Eman na Sint Maarten ta forma parti di un programa oficial cu ta inclui e prome Kingdom Summit, programa pa diamars 17 y diaranson 18 di november 2026.
Durante e encuentro aki, e gobiernonan di Aruba, Corsou, Sint Maarten y Hulanda ta reuni pa dialoga tocante fortalecemento di cooperacion den Reino. Cada pais lo presenta su propio State of the Nation, unda Prome Minister Eman lo comparti e situacion actual di Aruba, su retonan y oportunidadnan pa cooperacion futuro. Vice-prome minister Gerlien Croes y Prome Minister Mike Eman ta participa na e Ministerieel Vierlandenoverleg Onderwijs, Cultuur en Wetenschap (M4LO), unda e representantenan di e paisnan di Reino ta trata temanan relaciona cu enseñansa, cultura, ciencia y oportunidadnan pa studiantenan Caribense.
E Kingdom Summit ta reuni representante di gobierno di Aruba, Corsou, Sint Maarten y Hulanda, cu e obhetivo di fortalece cooperacion, relacionnan mutuo y desaroya un vision comparti pa futuro di Reino Hulandes.Ademas di Prome Minister Mike Eman y Minister Gerlien Croes, e delegacion oficial di Aruba pa Kingdom Summit ta consisti di Secretario General di Ministerio di Asunto General Robert Candelaria, Chief of staff di Minister Croes Bernice Schulte, Secretario di Conseho di Minister Indra Hassell-Duarte y Hefe di Prensa Marko Espinoza.
https://diario.aw/categories/noticia/general/prome-minister-mike-eman-ta-ricibi-un-bonbini-caluroso-di-chuchubi-foundation-na-sint-maarten#sigProId73fba9688c