James Sneek di Telefon pa Hubentud:
ORANJESTAD (AAN): Diabierna, 20 di november, Telefon pa Hubentud ta conmemora 27 aña desde cu e prome mucha na Aruba a yama number 131 pa ricibi sosten emocional, guia y conseho. Desde e prome yamada ey, e linea a sigui brinda un oido atento na muchanan y hobennan. Actualmente, 131 ta sirbi e comunidadnan di Aruba, Bonaire, Saba y Sint Eustatius cu e mesun meta: scucha, sostene y orienta.
Den conexion cu e aniversario, riba fecha di Dia Internacional di Derechonan di Mucha, James Sneek di Telefon pa Hubentud a comparti informacion tocante e actividadnan di conscientisacion cu lo tuma lugar durante e siman aki.
Diabierna, 20 retonde na Aruba lo hisa bandera di linea di telefon 131. Cu e iniciativa aki, Telefon pa Hubentud kier recorda mayornan cu nan por referi nan yiunan na e linea ora cu nan ta sinti cu nan yiunan tin mester di un combersacion, sosten of informacion. Sneek a enfatisa cu 131 ta un aliado di mayornan den e educacion y bienestar di nan yiunan.
Ademas, 53 scol basico y secundario na Aruba lo hisa bandera di 131 pa un siman. E participacion di scolnan tin como meta pa recorda muchanan y hobennan cu tin un caminda pa busca sosten ora nan ta enfrenta dificultad of no sa cu ken pa papia.
Sea cu ta trata di preocupacionnan personal, problemanan na cas of otro reto, muchanan y hobennan por yama 131 anonimamente. Tambe nan por tuma contacto via chat y email. E servicio ta disponibel tur dia, di 2:00 pa 6:00 di atardi.
Como parti di e celebracion, Telefon pa Hubentud a lansa e campaña ‘Who is Driving’, cu ta invita mayornan pa participa activamente den e bida online di nan yiunan. E campaña ta pone atencion na e importancia di orientacion y dialogo tocante uzo di internet, cu ta ofrece oportunidadnan pa siña y desaroya, pero tambe ta trece reto y risico. E campaña ta visibel riba e medianan social di Telefon pa Hubentud.
Cu 27 aña di servicio, Telefon pa Hubentud ta renoba su compromiso pa scucha y sostene muchanan y hobennan. E mensahe ta keda mescos, cada mucha tin derecho di ser scucha, y ningun mucha mester sinti cu e ta su so cu su preocupacionnan. Pa mayornan, e invitacion ta pa mantene e dialogo habri, tanto na cas como tocante e bida online, y recorda cu 131 ta cla pa brinda sosten.