Prome Minister Mike Eman ta duna impulso na mehoracion den bario

Accion di Bario ta bek!

ORANJESTAD (AAN):  Diahuebs mainta, Prome Minister mr. Mike Eman, acompaña pa un ekipo yen entusiasmo di Bureau City Inspector, Polis di Bario, Serlimar, DOW, GKMB y Departamento di Asunto Social (DAS), a drenta Semeleerstraat na Noord pa oficialmente duna inicio na e programa di “Accion di Bario”, un proyecto cu ta re-establece e contacto entre Gobierno y comunidad.

            Accion di Bario a nace durante e prome periodo di gobierno di Mike Eman como un strategia integral pa ataca varios problema na nan raiz den nos barionan: di acumulacion di desperdicio, yerba y mata cu a crece for di control, te preocupacion social y situacion di abandono. Lamentablemente durante e gobierno anterior, a stop e programa aki y e consecuencia ta visibel. Awe, bao direccion di Gabinete AVP-Futuro, a cuminsa cu e iniciativa aki bek pa revitalisa nos barionan.

            Durante Accion di Bario, Prome Minister Eman mes a subi caya, dialoga cu habitantenan y a haci un yamada pa participacion civico. Un bario limpi, sigur y saludable ta un derecho di tur ciudadano, pero tambe un deber colectivo.

            Den Semeleerstraat, e ekipo a topa un situacion alarmante: un acumulacion masivo di sushi grandi, artefactonan manera sofa, frigidair y wasmachine, y otro sushedad cu ta crea un riesgo pa salud publico. Segun habitantenan, e ceramento di dump na Parkietenbos y e aumento drastico den prijs di baki di sushi ta pone un peso grandi riba e famianan di entrada limita. Sin alternativa,  ta acumula desperdicio den curanan, creando “mini-dumpnan di bario”.

            Di dialuna caba, e ekipo di limpiesa a cuminsa cu e trabao cu hopi dedicacion. Diahuebs so, a yena 5 baki grandi di sushi, sin conta e cantidad di pick-upnan di e ploegnan di limpiesa cu tabata bay y bolbe yena completo pa EcoTech. Pa diabierna, ta planea di yena 3 baki grandi mas, pa finalisa e operativo den e area.

            E ambiente den Semeleerstraat awe tabata yena cu alivio, gratitud y speransa. Habitantenan ta sinti cu finalmente Gobierno ta drenta den e bario y tuma accion concreto pa mehora e calidad di bida di cada ciudadano. Limpiesa y mantencion den bario, ta un responsabilidad colectivo.