Minister Geoffrey Wever na DCALFA:
ORANJESTAD (AAN): E conferencia anual di Dutch Caribbean Agriculture, Livestock, and Fisheries Alliance (DCALFA) ta un encuentro clave pa futuro sostenibel di agricultura, pesca y cria di bestia den Caribe Hulandes. Desde cu a firma e prome Memorandum of Understanding (MoU) na juni 2023 entre Aruba y su islanan ruman, a compromete pa stimula produccion local, mehora seguridad di cuminda y reduci dependencia di importacion.
Basa riba e MoU e seis (6) islanan di Caribe Hulandes a traha un roadmap pa sigui traha hunto riba seguridad di cuminda, fortificacion di e sector primario di tur isla, y e cooperacion strategico entre e islanan. Na final di e conferencia Minister Geoffrey Wever y Diputado Anjelica Cicilia di Infrastructura di Boneiro a formaliza e roadmap cu DCALFA a prepara y asina a sigura cu e plataforma ta conta cu e apoyo gubernamental y por continua cu e trabounan strategico.
“DCALFA ta un conferencia crucial pa nos islanan ruman sigui eleva cada un nos produccion local, y identifica oportunidad pa colaboracion,” Minister Wever a bisa. “E tipo di cooperacion regional aki ta exactamente e tipo di accion structural cu Aruba mester pa sigui avansa den un manera sostenibel.”
Minister Wever ta gradici e team organisador cu e biaha aki a keda den man di Boneiro pa un otro conferencia exitoso. Tambe Minister Wever ta gradici e ekipo di DLVV di Aruba, bou guia di Sra. Nathalie Maduro, pa nan input y pa representa Aruba dignamente. Un danki grandi tambe ta bai pa Boneiro y especialmente na Diputado Cicilia pa e hospitalidad cu Boneiro a ofrece.
