Prome Minister Mike Eman ta anuncia renobacion di De Vuyst y Bushiri tambe

Via di fondo di AIOF

ORANJESTAD (AAN): Durante un evento nacional dilanti di Hulp Bestuurskantoor na San Nicolas, tur minister di Gabinete AVP-Futuro a presenta e proyectonan di inversion pa e proximo añanan. E presentacion a sigui e aprobacion di e presupuesto di AIOF pa 2026 y 2027 y a inclui tambe inversionnan cu otro fuente di financiamento.

   Den su discurso, Prome Minister Mike Eman a anuncia e renobacion pa e barionan De Vuyst y Bushiri.

El a reafirma cu e prioridad ta mehora calidad di bida, cu atencion special pa pensionadonan, famianan di menos recurso y esnan mas vulnerabel. Despues di e presentacionnan di su coleganan, Prome Minister Mike Eman a conecta e agenda di inversion cu un compromiso social cla: percura pa e desaroyo di pais trece un diferencia concreto den bida di hende.

   Bario di De Vuyst: Prome Minister a anuncia un proyecto di renobacion pa e bario De Vuyst. El a destaca e necesidad di facilidad deportivo, espacio di recreaccion y un ambiente cu ta ofrece e habitantenan e calidad di bida cu nan ta merece. El a menciona trabao di mantencion cu ta andando of a finalisa caba den Village y Mabon y a expresa e deseo pa e esfuerso di renobacion continua durante e periodo di gobernacion cu tin ainda pa dilanti.

   Bario di Bushiri: Bushiri lo ta e siguiente bario cu tambe lo conoce un renobacion y mehora den su areanan reacreativo.  Segun Eman, tin hopi trabao pa haci den e barionan cu ta den deterioro.

   E meta ta pa cada bario ricibi e atencion necesario, tanto pa su casnan como pa e facilidadnan y espacionan cu e habitantenan ta haci uzo den conhunto.

   Desaroyo cu atencion pa mantenimento: Eman a reflexiona riba inversionnan anterior den infrastructura, incluyendo e conexion entre Playa y San Nicolas pues e Green Corridor y e ringweg entre aeropuerto y e area di hotel pues E.J. Watty Vos Boulevard. Tambe a destaca e importancia di e conexionnan aki pa e desaroyo economico di Aruba y pa crea oportunidad nobo pariba di brug. Prome Minister Eman tin preocupacion pa e deterioro di e edificionan, facilidad deportivo y scol cu anteriormente a renoba durante su prome dos gabinetenan.

   Su mensahe tabata cu, ademas di realisa proyecto nobo, ta necesario mantene y cuida locual ya ta construi pa nos comunidad.

   Comunidad ta un parti esencial di e cambio: Eman a destaca cu e progreso di un pais ta depende tambe di locual su ciudadanonan por haci hunto. Como ehempel, el a reconoce e trabao di varios boluntario na San Nicolas cu ta dedica nan tempo pa drecha y pinta cas den Bernhardstraat. E esfuerso aki ta contribui na un ambiente nobo y un sentido di speranza den e bario.

   El a gradici e ekipo di boluntario cu ta traha sin haya un cen, motiva solamente pa e satisfaccion di contribui na nan comunidad. Eman a conecta e esfuerso aki cu e fe y perseverancia cu a yuda San Nicolas enfrenta varios tempo dificil, incluyendo e impacto di ceramento di refineria cu a causa hopi desempleo y pobreza.