Comandante Jair Tromp:
ORANJESTAD (AAN) -- Tanto e Minister encarga cu Brandweer como e sindicato di KBA, ta comenta cu Cuerpo di Bombero tin hopi reto su dilanti, inmediato como pa e temponan venidero.
Den entrevista cu Jair Tromp, Comandante, a puntre kico su vision ta di awo pa 2027.
“Nos tin un par di plan, nos sa kico nos kier haci pero no solamente di mi cu mi coleganan, pero di gobierno tambe, pa wak cuanto fondo tin disponible pa brandweer, y nos ta contento cu nos a haya awo e tres truck nobo cu ta yuda, pero tin mas cos cu nos mester atencion, entre otro uniform, a yega momento pa camina atrobe, pues tin un par di reto grandi”, segun Comandante Tromp.
El a agrega cu e problema di mas grandi di Brandweer ta cu e ta un Cuerpo cu su material no ta cosnan barata, pero cu ta rekeri un inversion basta grandi, pa gobierno den e caso aki.
“Esaki ta algo cu hopi biaha bo tin cu haci den fasenan: kico bo ta haci awe, kico bo ta warda pa haci por ehemplo otro aña of aki dos aña. Pero e ora nos sa bon kico ta bay sosode.
Mi ta contento tambe cu e audit di Aeropuerto a sali bon pa Brandweer, mas positivo cu e ultimo añanan y esey tambe ta duna nos confianza cu nos ta riba bon caminda” Comandante Jair Tromp a señala.
Tromp a comenta cu un Isla cu ta den desaroyo, manera Aruba, tin cu desaroya tambe su servicionan y e ora ey un Cuerpo di Bombero ta importante pa e bay dilanti pasobra ta esun cu por cover e riesgonan cu tin aworaki na Aruba y cu bista pa futuro. “Dus no wak e Cuerpo cu tabata diez, binti aña pasa, pero mester ta un Cuerpo cu nos por draai aki diez aña, diescinco, binti aña”, Comandante Jair Tromp a acentua.
Na final el a expresa un mensahe pa nos hobennan cu tin cu prepara pa un profesion pa pone nan bista riba, por ehemplo, Brandweer cu ta un bon y bunita profesion.
