Prome Minister Mike Eman a reuni cu Fundacion Proteha Abeha Aruba

ORANJESTAD (AAN): Prome Minister Mike Eman a reuni cu representante di Fundacion Proteha Abeha Aruba pa

papia tocante e importancia di proteha e abehanan y crea mas concientisacion den nos comunidad riba e papel esencial cu nan ta hunga den nos naturalesa y siguridad di nos alimentonan.

Durante e reunion, presidente di e fundacion, Jhowell Maduro, specialista den abeha cu a representa Aruba dos biaha na Bogota den actividadnan internacional di e mundo di abeha, a comparti diferente informacion tocante e trabou cu e fundacion ta haci pa promove proteccion di e abehanan na Aruba.

Maduro a splica cu e abehanan ta responsabel pa polinisa un gran parti di e matanan di fruta, berdura y otro planta cu ta forma un parti importante di nos ecosistema. Segun Maduro, sin e trabou di e abehanan, ta bira hopi mas dificil pa mantene un naturalesa saludabel y un produccion di alimento sostenibel. Un di e mensahenan principal cu a comparti ta cu no tur abeha ta un peliger.

Ora un neishi di abeha ta crea un situacion di riesgo, e solucion no ta pa mata e abehanan, sino pa contacta un specialista di abeha cu por rescata y relocalisa e abehanan di un forma sigur. Tambe a destaca cu tur ciudadano por contribui na proteccion di e abehanan door di limita e uzo di pesticida, specialmente riba e flornan, planta mas mata cu ta produci flor, planta mas mata cu ta duna flor pa duna nan alimento y pone awa disponibel den tempo seco.

Prome Minister Mike Eman a expresa su apreciacion pa e trabou cu Fundacion Proteha Abeha Aruba ta haci y a enfatisa cu iniciativa manera esaki ta contribui na un Aruba mas consciente di e balor di nos naturalesa y di e necesidad pa proteha e diferente specie cu ta indispensabel pa un desaroyo sostenibel.