Axcel Figaroa, lider di TOPA:
*Pero door cu a tarda e placa a wordo uza pa otro caminda
ORANJESTAD (AAN)-- Lider di Sindicato TOPA, señor Axcel Figaroa, den entrevista cu Matutino DIARIO a comenta cu e situacion di e edificionan, cu ta afectando e trahadornan di Departamentonan di Labor y DIMAS no ta algo di aworaki, pero ta data for di aña 2019.
“Pa hacie un tiki mas reciente, na 2023, si mi no ta ekivoca, pa insistencia di TOPA nos a pidi pa forma un Comision pa atende full e asunto aki. E Minister den e añanan ey, a forma e Comision y a hacie oficial via un Decreto Ministerial. E Comision ta consisti di DOW, Brandweer, DTI, DVG y tambe DAO, y nan a haci un onderzoek, y, aparentemente, nan a traha full un rapport, pero TOPA te awe no a mire, pasobra nan no ta “opdrachtgever”. Opdrachrgever ta Land Aruba.
“Kiermen Land Aruba mi ta asumi a haya e rapport. Nos a puntra den e reunion cu nos tabata tin recientemente cu Minister, y nos a pidi pa nos haya un bista di e rapport pa wak kico ta e consehonan cu nan a duna, pero nan ta bezig ta laga nos haya mas informacion pronto. Dus, nos ta pendiente pa e rapport, y pa nos ta importante pa wak esaki”, Figaroa a indica, agregando: “ Nan tabatin placa destina pa drecha full e edificio, pasobra nos no ta papiando di DAO so, nos ta papiando di DAO y DIMAS, pero kico ta pasa? Como cu nan a tarda cu ne, e placa a wordo destina pa otro caminda. Pues aworaki nos ta net na cuminzamento” Figaroa a menciona.
El a agrega cu recientemente a constata cu tin schimmel pasobra tin hende a cay flou den e edificio y tin cu mester a wordo hospitaliza un par di dia y tin cu mester a bay Eerste Hulp y sali bek.
“Nan a haci un onderzoek y atrobe mi ta reitera cu nos di e sindicato no a haye, pero nos tin informacion cu nos a tende cu e edificio no ta saludable y e trahadornan mester sali for di eyden”, Axcel Figaroa remarca.
El a agrega cu pa TOPA ta straño cu e no ta saludable pa trahadornan di DAO, pero pa DIMAS si. “E ta djis mi ta puntra, pasobra ami mes no tin e contesta ey. Mi ta hay’e hopi straño.
“E trahadornan a protesta, nos a manda diferente carta pa e Minister tambe, y awo ultimo nos a haya oido riba dje”, Axcel Figaroa, Presidente di Sindicato TOPA a duna di conoce.
