ORANJESTAD (AAN): Durante su bishita oficial na Peru, Prome Minister Mike Eman a reuni cu Lourdes Flores Nano, figura historico di Partido Popular Cristiano, PPC.
E encuentro a tuma luga na San Isidro, Lima den ambiente di celebracion di Fiestas Patrias, un momento importante pa pueblo Peruano cu ta conmemora su independencia y identidad nacional. Prome Minister Eman y Flores Nano a intercambia palabra riba e relacion entre Aruba y Peru y e importancia di mantene contacto cu lider politico y social den Latino America. E encuentro ta forma parti di e esfuerso pa amplia e lasonan di Aruba den region.
Lourdes Flores Nano ta abogado y un di e figuranan mas conoci den politica di Peru. el a sirbi como congresista, a participa como candidata presidencial y ta un lider historico y representante legal di Partido Popular Cristiano (PPC).
Como gesto di amistad y aprecio, Prome Minister Eman a entrega na Flores Nano un moneda conmemorativo di Aruba. E moneda ta marca 40 aña di Status Aparte y 50 aña di Himno y Bandera di Aruba. E regalo ta representa dos momento importante den historia y identidad nacional di nos pais. Na mes momento, e ta simbolisa e amistad entre Aruba y Peru y e deseo pa sigui fortalece e relacionnan politico, cultural y diplomatico.
E encuentro na San Isidro tabata informal, pero significativo. el a ofrece un oportunidad pa comparti un parti di historia di Aruba durante celebracionnan patriotico di Peru y pa establece un contacto cu un figura importante di politica Peruano.
