Prome Minister Evelyn Wever-Croes a reuni cu Parlamento Hubenil

Varios tema cu ta di importancia pa nos hobennan a wordo trata

ORANJESTAD (AAN): Diabierna 19 di november, Prome Minister Evelyn Wever-Croes y Minister Rocco Tjon y señora Stephanie Croes tabata tin un encuentro ameno cu Directiva y e hobennan cu ta miembro di Parlamento Hubenil. Presente tabata Presidente: señor Devaney Martines, Penningmeester: Christopher Lake, Jeugdcoordinator: Glendeline Arends- Maldonado y miembronan di Parlamento Hubenil: Joshua Tromp, Jean Eduardo Croes, Jeanrick Zimmerman, Jisela Solognier,, Jordan Peterson, Allan Ridderstap, Genevieve Marchena, Lipika Motwani, Ayden Arends, Christopher Leysner, Vicente Lyspali, Ronan van Putten y Derson Lampe.

            En conexion cu ta Dia di Derecho di Mucha, Parlamento Hubenil a pidi un reunion cu Gobierno y Parlamento. Prome Minister a duna di conoce cu e tabata un reunion hopi ameno hunto cu colega Minister Rocco Tjon y Stephanie Croes. Varios tema cu ta di importancia pa nos hobennan a wordo trata.

            “Nos a yega tambe na palabracion cu ta hopi importante pa reuni 1 biaha pa cada kwartaal riba varios topico cu e hobennan kier trece dilanti y pa duna Gobierno conseho con pa tuma decisionnan cu ta den interes di nos hobennan, asina haciendo nan un tipo di organo di consulta di nos hobennan. Esaki ta nos compromiso.

            Nos ta kere ta importante no solamente pa scucha nos hobennan pero pa duna nan tambe participacion den e decisionnan importante pa nos pais pasobra na fin di dia mañan ta nan tin cu carga e consecuencia di nos decisionnan. Un bunita reunion y tin hopi potencial den e hobennan cu tabata presente awe”, Prome Minister a duna di conoce.

            E siguiente reunion cu Parlamento Hubenil lo ta dia 18 di Februari 2022 y ya caba e hobennan ta preparando e puntonan di agenda.