Studiantenan di EPB Hato y San Nicolas cu bishita di orientacion na Amsterdam Manor Beach Resort

ORANJESTAD (AAN): Amsterdam Manor Beach Resort a ricibi studiantenan di EPB Hato y EPB San Nicolas riba 17 y 18 di November, pa asina nan conoce mas di e hotel y orienta nan mes den e trabao di e diferente departamentonan di e propiedad.

            Como miembro di ATSA, Amsterdam Manor Beach Resort ta participa anualmente na e programa di bishita di orientacion. E obhetivo principal ta pa laga e studiantenan aprecia e industria turistico y siña di e diferente ramonan di estudio y conocemento cu ta contribui na e operacion di un hotel.

            Durante e dos dianan, 29 studiante en total tabata presente, hunto cu nan respectivo mentornan. E studiantenan a ricibi un splicacion riba e structura general di maneho di e propiedad, como tambe e structura individual di cada departamento, e reglanan di comportacion den e industria, e aspecto di ta cordial y servicial, disciplina na pia di trabou, e posibilidadnan pa crece y claro pa disfruta di nan trabao.

            E bishita aki ta duna e studiantenan e oportunidad di por wak di cerca con un hotel ta opera y nan por haya un miho bista di e industria.  Na e momento cu nan mester tuma decisionnan di ki rumbo nan kier bay den bida, nan por haci esaki cu un base solido y bon informa di kico e industria di turismo ta ofrece nan. 

            Pa Amsterdam Manor Beach Resort ta un placer di forma parti den e programa di orientacion y asina contribui na stimula studiantenan pa forma parti di e desaroyo di turismo na Aruba.