Prome Minister Eman kier pa Aruba conecta patrimonio cultural y bibliotecanan di manera mas structural

A mira buki y mapa historico durante bishita na Koninklijke Bibliotheek na Den Haag

ORANJESTAD (AAN): E siman aki, Prome Minister Mike Eman a realisa un bishita na Koninklijke Bibliotheek (KB), e biblioteca nacional di Hulanda, unda el a reuni cu Ronald Huizer, miembro di e management team di e institucion. Durante e encuentro nan a intercambia idea tocante conservacion di patrimonio historico y cultural, e importancia di biblioteca y oportunidad pa cooperacion den futuro cu Aruba.

   Koninklijke Bibliotheek, estableci na 1798, ta un di e institucionnan mas importante di Hulanda den tereno di conservacion di material skirbi. E biblioteca nacional ta encarga pa colecciona, conserva y haci accesibel e bukinan, corantnan, manuscritonan, mapanan historico y publicacionnan digital. Ademas di conserva e documentonan aki pa generacion den futuro, KB ta desempeña un rol importante den digitalisacion di e coleccionnan historico y den e desaroyo  di e red di e bibliotecanan publico na Hulanda. Durante e bishita, Prome Minister Eman a ricibi un recorido den e biblioteca, caminda el a haya oportunidad di contempla diferente buki y mapa historico cu ta relaciona cu Aruba. E materialnan aki ta forma parti di e herencia historico cu ta contribui na un miho  conocemento di e pasado di nos isla.

   Ronald Huizer a expresa su satisfaccion cu e bishita di Prome Minister Eman y e delegacion di Aruba. Segun Huizer, e encuentro no solamente a brinda oportunidad pa contempla varios documento historico valioso, sino tambe pa intercambia idea tocante futuro di patrimonio cultural y e rol di bibliotecanan den haci conocemento mas accesibel. Huizer a expresa su deseo pa continua e cooperacion den futuro, particularmente pa haci buki y patrimonio historico mas accesibel pa publico.

   Di su parti, Prome Minister Mike Eman a expresa su agradicemento na Ronald Huizer, señora Alberts y henter e ekipo di Koninklijke Bibliotheek pa e recepcion cordial, e recorido y e organizacion di e encuentro cu e delegacion di Aruba. Durante su bishita, Prome Minister Eman a destaca cu Aruba actualmente ta dedica atencion intensivo na e manera cu patrimonio historico, patrimonio cultural y biblioteca por keda conecta cu otro di un manera mas structural.

   E prome minister a splica cu e obhetivo di e esfuersonan aki ta pa haci nos herencia cultural mas accesibel pa poblacion, no solamente pa stimula un miho conocemento di nos historia, sino tambe pa promove reflexion tocante e futuro di Aruba. Eman a expresa cu e manera cu Koninklijke Bibliotheek ta conserva y haci su coleccionnan accesibel ta un ehempel inspirador pa e trabao cu Aruba ta buscando di realisa den e tereno aki.

   E bishita tambe a brinda oportunidad pa contempla e posibilidadnan di cooperacion entre Aruba y Hulanda den e tereno di conservacion di patrimonio cultural y acceso na informacion historico. E vision presenta durante e encuentro ta pone enfasis riba e importancia di conecta nos pasado cu nos futuro. Haciendo patrimonio cultural mas accesibel, mas ciudadano lo por conoce e historia di nan isla y compronde miho e desaroyo di Aruba.

   Prome Minister Eman a conclui e encuentro expresando su aprecio pa e hospitalidad di Koninklijke Bibliotheek y e inspiracion cu e bishita a brinda pa e esfuersonan cu Aruba ta realisando den e tereno di patrimonio historico y cultural.