Ministerio di Educacion y IPA ta organisa ‘Siman di Capacitacion Enseñansa Multilingual’

Ministro Gerlien Croes:

• Den cuadro di Learning Cities cu prof. dr. Joana Duarte 

ORANJESTAD (AAN): Den cuadro di e implementacion di e Maneho Integral di Idioma y e modelo di enseñansa multilingual, Ministerio di Educacion, den colaboracion cu Instituto Pedagogico Arubano (IPA) y prof. dr. Joana Duarte di Universidad di Groningen, ta organisa e ‘Siman di Capacitacion pa Enseñansa Multilingual’ durante e siman di 19 di October 2026.

   E siman di capacitacion aki ta marca e prome fase di un trayecto di profesionalisacion di varios aña, diseña pa eleva y reforsa e calidad di enseñansa den nos contexto multilingual. E obhetivo principal ta pa amplia e conocemento y habilidadnan practico di nos educadornan riba tereno di didactica di siñamento multilingual, translanguaging y e uzo strategico di e idioma materno den e proceso di siñamento.

   Programa y Actividad: E programa di e siman di capacitacion a cuminsa dialuna 19 di october 2026 cu e Mini-conferencia titula ‘Strategianan di enseñansa multilingual’, cu a tuma luga di 14:00 pa 17:00 pm na Renaissance Convention Center. E sesion aki tabata dedica na cabesante di scol, maestro, directivana di scol y tur profesional envolvi den enseñansa di kleuter y basico.

   Posteriormente, di diamars 20 pa diahuebs 22 di october 2026, lo organisa e dianan di estudio pa maestronan di klas 1, 2 y 3, di 08:00 te cu 15:00 or. E prome dia di estudio, diamars 20 di october, cu lo tuma luga na Instituto Pedagogico Arubano (IPA), mientras cu riba diaranson 21 y diahuebs 22 di october, e sesionnan lo traslada pa e restaurant di Colegio EPI. E programma ta conta cu e siguiente topico di capacitacion;

   Tur idioma, un fiesta: Bo kier festeha cu nos den klas? Bin mira con un fiesta por contribui na ampliacion di vocabulario di alumno uzando translanguaging.

   E workshop aki ta enfoca riba con e tecnica di translanguaging (e uzo flexibel y natural di Papiamento, Hulandes, Spaño y Ingles) por yuda amplia e vocabulario di nos alumnonan uzando wega y tema cu ta activamente mara na e mundo rond di nan.

   Kico ta pasa si bo saca probecho di e idiomanan di bo alumnonan durante matematica y lesamento? Den e workshop interactivo aki, e participantenan ta participa na un actividad di matematica cu ta haci uzo di translanguaging. Tambe nan lo descubri con pa reconoce texto y con pa uza nan den nan propio lesnan.

   Alumnonan den e rol principal multilingual: Con pa haci e alumnonan papia berdaderamente, mester ta den un idioma extranhero? Den e tayer aki, educadornan lo experiencia un tarea di idioma interactivo y cu sentido den forma di un rollenspel, enfoca riba e habilidad di papia y di haci conversacion. Lo explora e diferente maneranan pa aplica translanguaging y traduci e experiencia aki directamente pa un metodologia aplicabel den nan propio klas.

   Finalmente, Minister di Educacion ta extende gratitud y reconocemento na Instituto Pedagogico Arubano (IPA), y e ekipo organisador pa nan gran esfuerso y dedicacion den realisa e siman di capacitacion aki. Na mesun momento, e mandatarionan ta haci un yamada na tur cabesante di scol, maestro, directiva y profesional di enseñansa di kleuter y basico pa participa activamente den e diferente actividadnan aki. E capacitacion aki ta un oportunidad valioso pa adkiri herment practico cu lo enrikece e proceso di siñamento di nos muchanan, y pa asina hunto sigui construi un futuro di excelencia pa e enseñansa multilingual na Aruba.

   Pa keda altanto di e oferta di profesionalisacion ta invita tur hende pa bishita e website di learningcitiesaruba.org.