President di Parlamento Marlon Sneek:
ORANJESTAD (AAN)-- Presidente di Parlamento di Aruba, señor Marlon Sneek, a duna di conoce den entrevista cu DIARIO, cu e reunion tripartiet (IPKO) cu a wordo teni na Corsou, siman pasa, a bay den bon esfera.
“T’asina cu normalmente, nos tin dos tripartiet pa aña, un na comienzo di aña y un na Juni. Anto durante esun cu nos tabata tin na Juni na Hulanda, nos a bin di acuerdo cu nos ta bay haci e reunionnan aki 4 biaha pa aña: tres ta presencial y un ta virtual”, Presidente di Parlamento a menciona.
El a sigui bisa cu e reunion cu a tuma lugar na Corsou tabata presencial, y e temanan cu pa nan tabata importante pa keda riba mesa ta e formanan cu rijkswetnan ta bin den bida, pa nan por tin un punto di bista riba dje, y cu sigur ta bira un punto di discusion den e siguiente IPKO cu ta bay tuma lugar na Januari 2027.
“Discusion riba e pasado di sclavitud tambe tabata un di e puntonan importante riba lista, unda tur hende a duna nan punto di bista di con leu cu nan puntonan cu nan ta haya cu mester ta riba agenda, y tambe e Cumbre cu ta bay tin na November, na St. Maarten, tocante Reino, toch e parlamentarionan ta sinti cu nan a wordo exclui.
Pues, si bo papia di un Cumbre di Reino mester inclui e parlamentonan tambe, no gobiernonan so. Anto, djeynan tambe nos a traha un ‘position paper’ na unda nos ta mustra, en todo caso, nos preocupacion cu e parlamentonan no a wordo inclui, y tambe pone kico ta e puntonan di bista cu nos ta kere cu mester bay discuti riba nan, na momento cu nos tin summit di e nivel aki”, Marlon Sneek a señala.
