Prome Minister demisionario ta haci un suplica pa tur hende bringa contra trafico humano

ORANJESTAD (AAN): Dialuna mainta na Gloria Entertainment Complex a tuma lugar e premiere di e pelicula traha localmente  yama ‘Otro Banda di Lama', cu ta trata e tema di trafico humano.

Tur caminda na mundo e fenomeno aki ta existi, incluyendo Aruba.

Na Aruba mas tanto ta trata di personanan di Venezuela cu ta purba busca un mihor bida riba nos isla.

Prome cu e pelicula a wordo pasa, Prome Minister demisionario Evelyn Wever-Croes a hiba palabra.

E mandatario a trece dilanti cu e problematica di e crisis di Venezuela y e impacto aki na Aruba ta algo cu tabata un prioridad riba e agenda di Gobierno, for di prome momento cu Gobierno a sinta.

“E magnitud cu e crisis migratorio aki a causa na Aruba, tur hende por a sintie, el a bira bisto y nos mester a haci algo”.

Banda di esaki Aruba tabata den un crisis financiero y social, mientras cu e crisis aki di Venezuela mester a haya atencion urgente, segun Wever Croes.

El a sigui bisa cu mirando e urgencia rond di e problema, el a dicidi di apunta dos asina yama ‘Keten Manager’ pa atende cu e crisis aki, esta Gina Lopez y Andy Lee, kende te cu fin di aña pasa tabata den e funcion.

“Nan prioridad tabata pa mantene un bon relacion cu organizacionnan local y internacional y pa por pone atencion inmediato pa por atende cu e retonan riba e tereno aki”.

Awe e atencion riba e crisis migratorio ta wordo duna y nos a haya ayudo di gobierno Hulandes den esaki, pa cual nos ta hopi agradecido, segun e Prome Mandatario.

El a splica cu na Mei di 2018 durante un bishita na Hulanda el a haci un peticion pa un asistencia financiero for di Hulanda, pa yuda Aruba atende cu e impacto di e crisis migratorio di Venezuela na Aruba.

Despues di algun tempo Hulanda a aproba un suma di 23 miyon euro pa atende cu e impacto di crisis di Venezuela riba e islanan di Reino.

Finalmente e suma disponibel pa Aruba tabata 7 miyon euro, mientras cu Aruba mester a presenta diferente proyecto pa demostra con esakinan por mitiga e problemanan cu ta wordo causa na Aruba y con por atende cu e problemanan aki.

“Na final un total di 41 proyecto a wordo aproba, di cual 28 ta den e categoria di asina yama ‘vreemdelingen keten’(cadena migratorio), mientras cu 13 tabata den e categoria di diferente otro sector manera educacion, labor y salubridad”.

Esaki segun e mandatario, kende a gradici minister demisionario di Husticia Andin Bikker hunto cu tur e departamentonan cu a traha hopi duro pa logra aproba e proyectonan aki.

El a splica cu Bureau Rampenbestrijding Aruba (BRA) ta esun cu tin e coordinacion principal y tambe ta responsabel pa maneha e fondonan.

Tin coordinadornan nombra y gruponan di trabao interdepartamental cu a wordo crea y ta trahando caba mas di 2 aña den cada un di e proyectonan.

Prome Minister a splica cu gran parti di e proyectonan a keda cla caba of ta den nan fase final.

“Un aspecto tristo, alarmante y peligroso di e crisis migratorio ta e fenomeno di traficacion y contrabando di hende (mensenhandel en mensensmokkel)”.

Traficacion din hende mihor conoci como esclavitud moderno, ta un delito contra e derechonan humano y pesey mi ta haci un apelacion na nos tur pa bringe na cualkier forma cu nos por.

E delito aki ta causando hopi victima rond di mundo y Aruba probablemente no ta un excepcion, segun Wever Croes, kende a sigui bisa cu como Gobierno responsabel e gabinete aki no por a para un banda y laga esaki pasa na Aruba.

Pesey e campaña di concientizacion ta asina importante.