ORANJESTAD (AAN): Dialuna mainta na e oficina di IBiSA tabata tin un conferencia di prensa organisa pa Fundacion Diabetes Aruba.
Judelca Briceño, representando Ministerio di Salubridad Publico a anuncia un proyecto conhunto entre Asociacion di Docternan di Cas (HAVA), Departamento di Salud Publico (DVG) y Fundacion Diabetes Aruba. E proyecto aki ta regarda prevencion den salud principalmente pa esnan cu ta sufri e malesa di diabetes.
El a indica cu como Ministerio di Salubridad Publico pero como DVG na aña 2020 conhuntamente cu Pan-American Health Organization (PAHO), Aruba a sa di lansa un documento asina yama 'National Multi-Sectoral Prevention NCD's Document'.
Briceño a laga sa cu esaki ta un documento mirando e problematica di salud cu tin na Aruba relaciona cu cuanto hende ta sufri di problemanan cardiovascular, diabetes, cancer, esta malesanan cronico y cu ta relata hopi cu estilo di bida manera actividad fisico, manera di come, etc.
Den cuadro di esaki a dicidi pa bin cu un plan nacional pa combati e asina yama 'NCDS Non-Communicable Decease'. Conhuntamente cu PAHO, Ministerio di Salud, DVG y stakeholders manera Fundacion Diabetes Aruba y PRISMA Aruba a traha e plan cual a bira un documento cu ta wordo traduci den productonan cu ta parti di e plan aki, a remarca.
Danki na e plan aki. PAHO a sigui duna sosten pa cu programanan. E documento aki ta basa den 'evidence based programs'. E meta no ta pa bay crea programanan nobo. Locual kier ta fortalece programanan existente caba y cu a demostra nan efectividad, Judelca Briceño a splica.
El a agrega cu danki na e plan nacional aki cu PAHO a sostene y danki na e hecho cu tin programanan 'evidence based' caba PAHO a demostra tambe e confiansa den e profesionalnan pa cu e programanan aki y a pone fondonan necesario pa asina na Aruba por realisa programanan cu ta cay den e vision di prevencion di NCD'S aki na Aruba.
Di e forma aki, a anuncia un di e prome productonan di e plan nacional aki y cu ta un programa ya existente caba cu danki na e fondonan di PAHO por wordo realisa y esaki ta e proyecto PRISMA Aruba dirigi na personanan cu diabetes.
