ORANJESTAD(AAN)- Su voz a resona den e sala, caminda Husticia na Aruba mester culmina.
Tabata na ocasion di instalacion di dos Hues, cu nos a scucha uno di e miho discursonan cu un Presidente di Corte di Husticia a yega di presenta pa defende e Estado di Derecho di Aruba.
Prome cu nos ripiti loke el a cita, nos mester bolbe presenta e motibo di consternacion grandi na Aruba.
Ministerio Publico na Aruba a base di investigacionnan preliminar manera Ley ta exigi, a dicidi cu por habri un caso di investigacion penal den otorgamento di tereno di Pueblo di Aruba na un forma cu tin aspectonan di ilegalidad.
E caso a wordo desaroya y autoridad a confisca loke e tabata considera importante como prueba legal, cu nos sistema di Estado di Derecho ta exigi hunto cu testimonio di testigonan.
DIARIO kier recorda aki, cu tabata DIARIO cu den pasado a lanta para ora na cualkier forma e aparato cu mester persigui loke ta contra ley na Aruba y asina mantene orden y ley na e pais, of cualkier actor den e panorama total di husticia, no honra e sistema democratico di nos pais.
DIARIO semper a duna prueba di ta critico cu tur instancia cu ta goberna Aruba segun e Trias Politica.
Den e caso di Avestruz, DIARIO simpelmente a tene su mes na informacionnan cu tabata desaroya y tabata trece informacion a base di e investigacionnan cu segun nos a mira a sigui e exigencianan legal di nos sistema democratico.
A bini claramente dilanti cu autoridad no a detene Benny Sevinger, kende tabata e Ministro encarga cu asuntonan di Tereno durante Gobierno Mike Eman cu tabata na mando di e gobierno di Aruba durante e temporada cu ta bou investigacion.
Benny Sevinger pa Miembro di Parlamento y a spera cu AVP lo a pidi Sevinger retira di representacion di Pueblo te ora investigacion a termina y e no ta sospechoso mas.
Esaki no a sosode mientras cantidad di sospechoso a wordo deteni. Atrobe nos ta uza e palabra detene, cu na Papiamento ta wordo uza pa diferente etapa den persecucion legal.
Actualmente nos por nota cu tin dos persona cu ta cualifica pa loke ta wordo yama na Hulandes “voorlopige hechtenis” (encarcelamento temporal) pa cual e tiponan di detencion prolonga “bewaring” (2x ocho dia) y “gevangenhouding” (cera den prizon) ta cualifica.
E decision aki no por wordo tuma dor di un Ministerio Publico riba su mes, pero mester di un Rechter Commisaris, manera e dirigente di AVP, Mike Eman cu ta un hurista sigur mester ta na haltura.
Pues no ta Ministerio Publico a dicidi pa loke ta pasa cu sospechosonan pero ta Rechter Commissaris, cu ta scucha testigonan y ta acumula evidencia, a dicidi.
Pues e atakenan politico di ultimo lunanan di parti di Mike Eman no ta mishi cu Ministerio Publico so pero cu nos Corte di Husticia.
Pa comprende kico esaki ta nifica, nos mester bay busca e berdad di nos sistema politico y nos ta topa cu e palabranan di e Presidente di Corte di Husticia na Aruba.
Mr. Eunice Saleh durante di instalacionnan di Huesnan na Aruba a mustra cu e persona cu kibra e confiansa den Huesnan, ta pone hacha na reis di e Estado di Derecho” segun un citacion cu el a presenta.
E palabranan aki a wordo expresa hopi tempo prome cu awe nos mester tambe di e parti di su discurso e ta splica con cada ramo di gobernacion tin su tareanan pa nos Estado di Derecho funciona.
Awe Aruba mester evita cu pasobra tin un politico como sospechoso den un case penal, hacha wordo poni na e confiansa den nos Huesnan den nos sistema legal.
Pa Aruba funciona como estado di derecho sigur personanan cu ta parti di mundo politico, cu ta base di Gobierno y Parlamento, mescos cu miembronan di e aparato di Husticia, mester percura pa e sentido democratico prevalece na Aruba!
