Prome Minister a reuni cu stakeholders pa reactiva e programa semanal di “Accion di Bario”

ORANJESTAD (AAN): Prome Minister Mike Eman a yama un reunion cu varios stakeholder cu e meta pa reactiva e programa semanal di “Accion di Bario”.

            Accion di Bario ta un programa cu Prome Minister Eman a inicia durante di Gabinete Mike Eman I, y cu a continua sagradamente durante di su di dos gabinete. Accion den Bario ta consisti di un grupo di instancianan manera DOW, Serlimar, Bureau City Inspector, GKMB, Polis di Bario y Sociale Zaken, cu hunto cu Prome Minister, ta cana den bario y atende cu varios problema cu ta encontra riba caminda publico.

            E iniciativa aki tin e meta pa incentiva e habitantenan pa reconoce cierto problema y brindanan e hermentnan pa por yuda soluciona esakinan riba den forma colectivo como habitante di e barionan.

            Durante e ultimo 7 pa 8 aña, gobierno anterior a neglisha y bandona mayoria bario den cual habitantenan tabaya sclama pa atencion social, pa e hobennan, pa parkenan di recreo y e calidad di bida den e barionan cu a keda deteriora. “Tin un necesidad grandi pa limpiesa den barionan tur rond di Aruba, y e habitantenan ta sinti cu gobierno anterior a bandona nan”, Prome Minister Eman a menciona.

            E siman aki, hunto cu e partnernan, Prome Minister Eman lo drenta bario for di mainta pa merdia. Ta di vital importancia pa ta cerca di comunidad, pa inventarisa e situacion den cada bario. Esaki ta inlcui canchanan deportivo cu den pasado a construi y cu mester mantencion, e luznan, e aceranan di caya cu mester drecha y mas.

            E compromiso di Gabinete AVP-Futuro, ta pa revitalisa nos barionan di manera structura y duradero pa tur hende por biba un bida digno.