Seraida Pemberton, director di Reclassering:
ORANJESTAD (AAN)—Directora di Stichting Reclassering, Seraida Pemberton a sigui elabora riba e uso di banchi, pa hobennan cu ta bao guia di Reclassering, y cu ta un alternativa mundial cu nan kier trec’e na Aruba tambe.
El a reitera cu e hoben cu ta uza un banchi tin programa cu e tin cu cumpli cu ne, y e tin cu bay structura su dianan unda e mag di bay unda no, e mag di bay di scol y di scol pa cas.
Señora Pemberton a splica cu e banchi ta un alternativa di un prison y e ta wordo uza no unicamente na Hulanda, pero tin’e na Curacao, Bonaire, Sint Maarten. Pues e ta un alternativa mundialmente uza y p’esey Reclassering kier a wak e posibilidad pa trec’e Aruba tambe. Esun cu nan a trece ta esun uza na pia.
E sistema aki di banchi ta poni den ley, Pemberton a indica, y e por wordo uza como un alternativa. “Aworaki nos ta bezig ta underhandle cu e compania, dus mi ta premira cu ta aki tres pa cuater luna nos ta focus riba dje”, director di Reclassering a bisa. E dependencia di criminalidad ta bay baha hopi mes, pasobra e hoben no ta experiencia e parti di prison. “Pero no ta tur caso, tur delito ta bay tin na remarca pa banchi, y esey nos tin nos maneho pa cu ne totalmente, y e ora ey nos kier introducie. E ta e direccion cu nos kier bay, si”, señora Seraida Pemberton, director di Reclassering, a relata.
