Parlamento di Aruba a ranca sali cu reunionnan na Washington D.C.

ORANJESTAD (AAN): Un delegacion di Parlamento di Aruba a inicia nan siman di trabou na Washington D.C.

Miembronan di e Comision di Norte America acompaña pa Presidente di Parlamento, Sr. Marlon Sneek y Griffier der Staten ta na Washington D.C. pa fortalece e relacion cu Merca. Esaki ta sosode pa prome biaha. Lazonanentre podernan legislativo ta garantiza cu e alianza cu Merca no ta solamente di gobierno pa gobierno, sino tambe entre Parlamento y Congreso.

            Riba e prome dia a hiba un combersacion cu Department of Homeland Security, cu ta responsabel pa mantene e seguridad di Merca. Nan enfoke ta preveni terorismo, seguridad di frontera, seguridad cibernetico, imigracion, responde na desaster y seguridad na airopuerto. Den un dialogo miembronan di Parlamento por a scucha kico ta e enfoke bou di e administracion di Presidente Trump. Esaki ta ensera principalmente e seguridad di Merca a base di deportacion di imigrantenan indocumenta, cu ta wordo considera ilegal.

            Tambe a inicia riba e prome dia e reunionnan na Congreso Americano cu miembronan di Comite di Relacionnan Exterior. E miembronan en cuestion ta representantenan di estado di Florida. Nan staff a facilita conversacionnan largo den cual por a haci pregunta y combersa riba temanan di importancia pa Aruba, manera Venezuela, migracion, comercio y inversion, turismo.

             Riba e di dos dia di trabou delegacion di Parlamento a haci un bishita na estado di Maryland. Durante e reunion na Maryland a conoce Secretaria di Estado, Susan Lee, y a dialoga cune y su staff riba oportunidadnan pa Aruba. Tabata tin hopi interes di banda di Maryland pa sa e prioridadnan pa Aruba, como cu e estado di Maryland por brinda cooperacion riba diferente area. Riba e area di deporte Maryland a indica cu lo kier traha hunto pa atrae atletanan di Aruba cu kier sigui studia, pero tambe organiza friendship tournament entre scolnan di Maryland y Aruba.

             Maryland tambe tin interes pa sa e direccion cu Aruba kier bay den energia, pasobra ta wak posibilidad pa intercambio di experticio. Companianan di Maryland ta buscando mas y mas pa inverti pafor di Merca y gobierno di Maryland ta yuda nan den esaki. Aruba tin un MoU caba cu Maryland cu ta un base pa inicia cooperacion concreto pa beneficio di nos ciudadanonan.

            E reunionnan riba e prome dianan a bai hopi bon y den un ambiente hopi positivo. Ta hopi usual cu miembronan di Parlamento di paisnan ta haci trabou di bishita na Merca, en especial si e pais ta un aliado. Gobierno Mericano ta aprecia pa mantene dialogo cu mandatario y legisladornan. Asina di banda di Merca nan ta sinti cu ta haya un vision amplio y democratico di e pais en cuestion. Como cu Parlamento ta esun cu ta bini cu ley y ta vota riba e presupuesto, di nan banda e bishitanan aki ta ofrece un bista completo di tematicanan di relevancia pa Aruba. Un alianza fuerte cu Merca ta basa riba gobierno henter y asina Parlamento tambe ta cumpliendo pa mantene un bon relacion bou di Presidente Trump.