Prome Minister a reuni cu Consul di Merca na Corsou

ORANJESTAD (AAN): Diamars 25 di October Prome Minister Evelyn Wever-Croes tabata na Corsou pa un dia pa atende reunionnan di Reino riba relacionnan exterior, ‘Koninkrijksoverleg Buitenlandse Betrekkingen’, (KOBB).

Prome Minister hunto cu Premier di Corsou Gilmar ‘Pik’ Pisas y Premier di Sint Maarten Silveria Jacobs a reuni cu Minister encarga cu Relacionnan Exterior Wopke Hoekstra di Hulanda.

            Prome cu e reunion cu e Premiernan y Minister Hoekstra, Prome Minister a reuni cu Consul di Merca, señora Margy Bond na unda a discuti diferente tema incluyendo e tema di Venezuela. Pero e punto di enfoke tabata riba oportunidadnan economico entre Aruba y Merca y con Consulado Mericano por hunga un rol den esaki. Di parti di Consulado, tabata tin hopi interes pa scucha mas di e plan di diversificacion economico y e plan pa atrae inversionista (investment policy) cu Aruba ta implementa.

            Remarcabel den e reunion tabata ta cu Consulado a elogia Aruba pa e hecho cu WEB Aruba a cera un convenio cu Eagle LNG prome cu e guera di Ukraine. E prijs cu a wordo palabra tabata hopi abou. Na e momento aki, varios compania di LNG ta bandonando nan palabracionnan mientras Eagle LNG a mantene su mes na palabracionnan. Consulado y Estado Mericano ta sostene e compania aki y inversionnan na Aruba.

            E sistema na Aruba ta hopi dirigi riba e mercado Mericano pa loke ta trata turismo. Y Aruba ta purbando di haya inversionnan tanto local y tambe inversionnan internacional especialmente di Merca.

            “E tabata un bon reunion cu Consulado Mericano y a toca diferente otro tema pa estrecha lasonan mas ainda entre Merca y Aruba”, Prome Minister a expresa.