Prome Minister a invita muchanan di scol basico pa bira ‘periodista pa un dia’

ORANJESTAD (AAN): En conexion cu Dia di Prensa, y mirando e exito di e prome edicion di ‘Periodista pa un Dia’ na aña 2021,

Ministerio di Asuntonan General a dicidi di organiza e di dos edicion di evento aki e aña aki tambe.

   ‘Periodista pa un Dia’ ta un proyecto importante pa stimula nos muchanan pa un posibel profesion den periodismo.

   E aña aki, un biaha mas lo enfoca riba nos muchanan di scol basico, ofreciendo nan e oportunidad pa cera conoci di un manera practico kico ta e trabao di un periodista. E proyecto lo inicia na Juni y lo ta riba cada diabierna, na unda 4 mucha lo worde invita na bestuurskantoor pa por haci nan preguntanan na Prome Minister. E ultimo dia di e conferencia di prensa hubenil edicion#2, lo trece tur e 20 muchanan hunto pa asina haya un rondleiding na TeleAruba.

   Pa esnan cu ta interesa pa aplica pa participa na e proyecto ‘Periodista pa un Dia’, por bay na e link:

www.bit.ly/prensadia

Aki bo ta yena nan informacion y preguntanan cu nan ta haya interesante pa puntra Prome Minister. E alumnonan cu a worde selecta lo ricibi un e-mail di confirmacion.

     Ban yuda nos muchanan descubri e periodista den nan y bira ‘Periodista pa un Dia’. Asina nan ta haya un oportunidad unico pa cera conoci cu Prome Minister di nos pais y haci preguntanan na e mandatario den e sala di conferencia di Gobierno di Aruba durante e di dos edicion di Conferencia di Prensa Hubenil na Bestuurskantoor.