Arkitecto a splica detayadamente con el a haya inspiracion pa diseña Iberostar Grand Aruba

Hotel elegante y luhoso cu lo habri otro aña na Eagle Beach

ORANJESTAD (AAN): Manera DIARIO a trece dilanti caba, e area di Eagle Beach lo bay haya un hotel luhoso cu ta pertenece na e multinacional di Spaña, esta Iberostar.  E construccion ta como 35% cla caba, y ta planea pa habri pa zomer 2024.

   E lo bira un di e top Hotelnan cu tin rond mundo dedica na servicio total, di luho, pa relaha, y disfruta di e cumindanan cu nan ta famoso pe, y cu hopi biaha ta deriva di menu local.  “Iberostar Grand Aruba” ta bao construccion caba na Eagle Beach, unda antes tabata POVA-Club, y lo wordo diseña cu adultonan den mente, pero cu categoria-superior, elegante, y luhoso lo bay tin facetanan arkitectonico extraordinario, cu suites espacioso cu amenidadnan di calidad halto.

   E diseñador, esta arkitecto Jose Maria Lopez a pasa basta tempo na Aruba pa conoce e area, pa admira tur loke Aruba ta dispone di dje.

   Segun Lopez, e mes como arkitecto y e compania ta conciente di e importancia di crea e prome hotel di Iberostar na Aruba.  Como cu ta trata aki di un proyecto asina special, na un isla nobo pa nan, cu un concepto nobo.  Nan tabata convenci cu tin di sorprende e cliente y crea algo completamente diferente.  Un producto nobo, diferente y elegante pasobra aki ta trata di un hotel cu categoria Grand, elegante pero fresco alavez, pa ta un hotel mey-mey di Caribe.

   E concepto principal ta bin debi na e lugar, colornan di lama, e colornan cu ta blikia debi na solo, y texturanan cu bo por haya den naturaleza.  Aki Lopez a splica cu el a keda inspira pa construccionnan na Aruba, y elementonan unico manera e tram na Oranjestad.  El a inspira riba e concepto “biomimicry”, of e biomimetismo die mundo marino, e parrot fish, y e coralnan.

   Esey ta e colornan cu el a usa pa wordo poni den un trabao minucioso di iluminacion, como tambe e paisahe pa asina crea un proyecto full diferente.

   Aki arkitecto Jose Maria Lopez a bisa cu el a encanta e colornan cla cu ta wordo usa na Aruba, y cu tin referencia na islanan di Caribe.  Tambe lo bay usa palonan di construccion cla, cu acabado natural y texturanan natural.  Pa cualkier piso of acera, lo bay usa color di santo blanco, piedra, y colornan suave.  Asina e Hotel lo bay haya su estilo personal, unico, y incorporando referencianan y tokenan local.

   Pero tambe siguiendo e trend global di Iberostar, lo bay usa hopi referencia di mundo marino, cu imagen, scultura, y formanan tur rond di e Hotel y den cambernan.  Tambe el a usa esaki pa diseña espacionan hopi operacional, sigurando e durabilidad y resistencia.  Pasobra tur espacio den e Hotel tin di cumpli corectamente cu e ergonomia y e comfort acustico.

   Lopez a splica cu e iluminacion ta hopi importante den nan proyectonan, y esey ta loke DIARIO a nota tambe den recien bishita na Cancun.  Iluminacion ta wordo traha den tur sorto di forma, y ta algo cu bo no ta djis drenta cualkier Hardware Store y cumpra.  Pa e artikecto, e espacionan den e Hotel mester ta diseña pa un specialista den e materia, creando espacionan trankilo, comfortable y calido.  Pero en general, e hotel tin di haya un diseño sostenible.

   Lopez a encanta cu e piscanan yama ‘Parrot Fish’, principalmente e colornan.  Esey ta loke Lopez a inclui tambe den e diseño, y e colornan di e Parrot Fish lo bay ta visible tur caminda den e edificio aki.

   E Hotel na Aruba lo bay tin 240 camber/suites, cu diferente piscina.  E lo bay tin un Convention Center, Casino, un monton di Restaurant.  Den proximo dianan, DIARIO lo sigui trece mas detaye impresionante di e siguiente top Hotel cu Aruba lo bay ricibi.