Prome Minister a haci traspaso di mando pa Carnaval 71

ORANJESTAD (AAN): Diadomingo mainta a tuma lugar traspaso di mando pa dirigi Carnaval 71.

Gobierno di Aruba Diadomingo na un manera simbolico a haci entrega di e spada, machete y yabi na e Prins y Panchonan.

Pa esaki Prome Minister Evelyn Wever Croes a dirigi palabranan na tur esnan presente, algun ora prome cu salida di e parada di mucha di Oranjestad.

Dilanti di Bestuurskantoor e Prome Mandatario a bisa cu ta un honor pa ricibi tur e Prinsnan, Panchonan y reinanan hunto cu nan famianan y e famia di SMAC.

“Nos ta tuma tur e exigencianan di e Prins y Panchonan na serio”.

Carnaval ta un celebracion di nos cultura y manera minister di Cultura ta bisa,  cultura bo tin cu bib'e.

Durante Carnaval Aruba ta demostra cu nos ta stima nos cultura y cu nos ta stima nos cultura.

Pesey mi gradici bosonan, segun Wever Croes.

El a cuminza na gradici SMAC y su presidente pa organiza e Carnaval e aña aki.

“Mi sa cu esaki no ta facil y cu durante e temporada tin criticanan ta bin dilanti, pero bosonan sa con pa guia tur cos y haci e fiesta aki uno exitoso”.

Di curazon masha masha danki pa e trabao cu bosonan ta haci.

Mi kier gradici tambe tur e reina, sponsor, grupo y famianan cu ta sostene boso.

Tambe mi kier gradici e Prinsnan y e Panchonan y esnan cu ta train nan pa nan haci un tremendo trabao riba stage, segun e Prome Minister.

 E Prome Mandatario a gradici tambe tur e ganadornan di e festivalnan di musica, como tambe tur e participantenan y e musiconan cu a yuda haci e festivalnan grandi atrobe y lo trece un dushi ambiente riba caminda durante e paradanan.