Exitoso tabata e evento di Colegio’s Got Talent

Organiza pa Key Club Colegio Arubano

ORANJESTAD (AAN): Recientemente e organizacion di Key Club Colegio Arubano a organiza e prome show di talento den historia di Colegio Arubano, cu a ser yama “Colegio’s Got Talent”.

   Cas di Cultura a ricibi hopi studiante, famia y maestro cu hunto a bin apoya e hobenan cu a mustra con hopi creatividad, talento y pasion nan tin.
   E evento a cuminsa 7:30‘or anochi, ora cu e maestronan di ceremonia Ashanti Zimmerman y Tara Ras a bisa bonbini na e audiencia.

   E show a conta cu diferente tipo presentacion cu a inclui pianista, canto, bailarin y banda. Los Ritmicos, un banda forma pa studiantenan di Havo 4 y Havo 5 a cuminza e show tocando e cancion ‘Push 2 Start’ yen di energia pa start e show. E siguiente acto tabata e talentoso pianista Gian Giel di Havo 5 cu a toca un composicion di Franz Liszt.  E di 3 performance tabata Howin Hoo di Vwo 6 cu mustra su chispa bailando cancion Buttons.

   Siguiente, Maria Isabel Londoño di Havo 5 a duna un tremendo rendicion di La Nave del Olvido. Y cerando e prome parti di e show, e audiencia a wordo brinda cu e bunita presentacion di e Cuarteto Vocal cu estudiante di Havo y Vwo cantando “A Thousand Years”.

   Despues cu e audiencia a tuma un break, e show a sigui cu Jordy Zievinger di Havo 4 cu a mustra su talento tocando un composicion di Chopin. E di 6 acto tabata e banda LURK, consistiendo di studiante di Havo 3, 4 y 5, cu a toca y canta e cancion “You Stupid Girl”.  E siguiente acto tabata Maria Carrillo Soto cu mustra tur su talento como artista cantando e conocido ranchera “La Malagueña”.

   Posteriormente a bin Taisha Tchong Florez, un mucha muher di 13 aña di ciclo basico, kende a toca na piano su mesun composicion. Y pa finalisa, e banda D.A.A.R. forma pa studiantenan di Havo y Vwo 4 a toca cu tremendo entusiasmo e heavy metal “Chop Suey”.

   Ora cu e ultimo performance a caba, e huradonan a keda cu e dificil tarea di dicidi e ganadonan. E cuerpo di hurado tabata componi pa director di Cas di Cultura Vicky Arens, fundado di Club di Movimiento Samata Westera, vice-voorziter di Het Cultuurfonds Caribischgebied Raffy Kock y docentenan di Colegio Arubano Jaderick Croes y Brandon Figaroa.

   Resultado final ta cu Maria Carrillo a sali cu e prome premio pa su tremendo performance, cu D.A.A.R na di 2 luga, e Cuarteto Vocal na di 3, Gian Giel na di 4 y Los Ritmicos na di 5 lugar.

   Henter e show ta disponibel pa mira riba e canal di YouTube di Key Club, y por mire na e website:

www.bit.ly/colekey

   Mas cu un competencia Colegio’s Got Talent tabata un celebracion di talento y creatividad. Cada artista a trece algo unico pa e show y comunidad di Colegio a duna nan total apoyo. E evento a finalisa cu un potret di full e grupo di artista bien como e miembronan di Key Club Colegio Arubano cu a organiz’e.