Prome Minister a corona Iva Luna Werleman como Chikitin Cultural 2023

ORANJESTAD (AAN): Diabierna atardi, Prome Minister Evelyn Wever-Croes cu inmenso placer a corona Iva Luna Werleman como Chikitin Cultural pa aña 2023.

            Prome Minister a expresa cu pa su persona esaki ta un momento hopi special, pa wak con nos muchanan ta wordo inculca cu nos cultura di chikito caba. “Esaki sigur ta importante, pa ora nan bira grandi nan ta carga tur e balornan cultural cu nos tur a lanta cu ne”.

            Prome Minister ta gradici tur esnan cu ta engrandece nos cultura, organisando tipo di eventonan asina cu ta inclui e muchanan. Tambe ta desea tur esnan cu ta bay atende e actividadnan den luna di September, e parada cultural, hopi exito. "Un danki di curason pa tene nos cultura semper na halto", Prome Minister a expresa.