Jurette Croes, PR di DVG ta reitera:
ORANJESTAD (AAN) –Jurette Croes, Relacionista Publico di Departamento di Salud Publico (DVG), den entrevista cu DIARIO, a menciona cu enberdad e preguntanan cu ta wordo haci na e encuestadonan di STEPS ta personal, ya cu ta regarda nan bida, nan custumbernan di come, nan salud, pero e ta reitera cu e datonan suministra, ta completamente confidencial.
Esnan cu ta haci e encuesta ta entrena pa haci esaki, y e informacion ta netamente pa haci maneho. E encuestadornan cu ta bishita e casnan ta bisti cu flanel blanco, cu tin e emblemanan di tur stakeholder y nan debido identificacion.
Nan ta confronta cu e hecho cu hopi hende ta trahando ora cu e persona cu ta colecta dato ta acerca e address pero nan ta laga un notificacion atras y e ora ey e cabes di cas por yama y haci otro cita. DVG ta urgi e personanan cu ta haya un notificacion cu Steps a pasa, pa yama bek y haci un afspraak.
Tambe tin verpleegster cu ta pasa na e casnan pa tuma muestra di sanger pa haci control di salud di e encuestadonan, pa haci’e mas facil pa e ciudadano mes. Pa Step 1 y 2 tin 2.470 persona cu a haci esakinan. Stap 2 ta encera tambe midimento di colesterol, cintura, haltura, y peso. Stap 3, cu ta e test di sanger tin 1.938 persona cu a hacie.
Falta rond di mil persona pa yega e meta, pero falta dos siman pa caba, aunke e personanan cu tin te aworaki, por duna DVG un bista amplio di con e situacion ta na Aruba, segun Jurette Croes, Relacionista Publico.
