Aworaki no tin argumento valido mas pa no introduci e Ley Plan di Mayor Obligatorio

Michella Lacle, Presidente Comision Plan di Mayor:

ORANJESTAD (AAN) – Michella Steenvoorde-Lacle, Presidente di Comision Plan di Mayor, a menciona den su presentacion na Matutino DIARIO, cu nan a lesa 43 rapport di cual esun di mas relevante ta un scriptie presenta pa studiante, na aña 2012, cu a core stage cerca Abogado Malmberg, y cu tabata consisti di compara e dos leynan di Plan di Mayor (Hulanda- Aruba), y su conclusion tabata e tempo ey, cu Aruba no tabata cla pa introduci e ley. El a duna su argumentonan, cu aworaki no ta valido mas, kiermen no tin argumento pa no introduci e Ley Plan di Mayor Obligatorio, Michella a señala.

Michella a sigui splica cu su no tin e “zorg traject” e ley di Plan di Mayor ta keda solamente un papel. Esaki ta hopi importante pasobra e ta e evaluacion di Ouderschap Plan, na 2013. Esaki na nifica cu na 2009 e ley a wordo introduci y na 2013 a wordo evalua.

            El a splica cu e Plan di Mayor Obligatorio, Acuerdo y funcionamento ta papia hopi den practica con e ta traha na Hulanda, kico nan ta encontra den practica y e parti di Kinder-Ombudsman tambe ta hopi importante. Tin e parti unda ta papia tocante e casonan cu mayornan ta keda pleita y no ta wak pa nan yiunan, y nan ta esnan cu ta keda atras cu e trauma. Tambe ta splica cu ora nan a introduci e ley, nan a bin cu yen di manera pa yuda e mayornan resolve conflicto y yega na un “ouderschap plan”.

            E ora ey hopi abogado a bay haci curso di mediacion pa nan tambe por yega na un plan di mayor cu nan clientenan pero nan a ripara cu cierto abogadonan tabata exitoso den mediacion, pero otronan no. Esaki pasobra mayoria di biaha, abogadonan ta wordo entrena pa tin un ganador y un perdedo. Pero den e casonan aki, no tin ganador ni perdedo, pero tur hende mester ta ganador, pasobra gewoon e famia ta sigui, pero den un otro forma.