Prome grupo di studiante di Colegio Arubano a sali pa Austria pa e proyecto ‘Deplastify the Planet’

E proyecto ta funda pa Erasmus+

ORANJESTAD (AAN):  Diabierna 10 di februari 2023 e prome grupo di 5 alumno a sali hunto cu docente nan Jaderick Croes y Edwin Vorderman pa Judenburg Austria pa traha hunto cu diferente otro scol den Europa riba e proyecto di “Deplastify the Planet” funda door di Erasmus+.

            Desde 2022 projectcoordinadornan di Erasmus+ di Colegio Arubano, Jessica Maduro y Crystal Koolman, a aplica pa dos proyecto na Erasmus+, un proyecto pa docente y un proyecto pa alumno. Tur dos proyecto a wordo aproba y 2023 a habri den un forma grandioso unda cu por mira cu nan a bira un realidad.

            E proyecto p’e alumno nan ta un proyecto en consorcio hunto cu 5 diferente pais, entre otro Spaña, Portugal, Croatia, Austria y Belgica. Hunto cu e alumnonan di e diferente paisnan aki ta bay traha riba un “comic book” cu tin como meta pa conscientisa e ser humano riba e impacto cu “single use plastic” tin riba nos medioambiente, nos flora y nos fauna. Alaves e alumno nan lo bin cu idea nan y manera nan pa asina por rebaha e uso di “single use plastic” rond di mundo.

            Tur alumno di HAVO3 y VWO3 di Colegio Arubano por a participa cu un video y e mihor nan a wordo selecciona, pa hunto cu Austria, Croatia, Spaña, Portugal y Belgica traha den un periodo di 2 aña riba e proyecto bunita aki.

            Diamars 7 di februari e alumnonan cu a wordo selecta pa bay Judenburg Austria, hunto cu nan mayornan y docente nan a pasa un anochi ameno cu otro hungando bowling. E evento social aki tabata pa asina nan siña conoce otro un poco mas mihor y pa e coordinadornan di e proyecto por a percura cu e alumnonan, nan mayornan y e docentenan ta completamente informa di e biahe cu e alumno nan lo bay haci.

             Cu hopi entusiasmo e alumnonan y mayornan a combersa cu otro y siña conoce otro mihor. E anochi social aki tabata uno fructifero. 

             E alumno nan aki di HAVO3 / VWO3 di Colegio Arubano hunto cu nan dos docente a sali rumbo pa Judenburg Austria diabierna 10 di februari ultimo. E prome grupo aki lo ta na Austria pa 1 siman, unda nan lo cumpli cu differente actividad. Nan lo traha entre otro hunto cu e alumno nan di tur e otro pais nan riba e “character development” di e comic book. Nan lo comparti idea nan cu e otro paisnan tocante manera nan pa reduci y reusa plastic.

             Nan lo ricibi un rondleiding na un fabrica cu ta traha chuculati na un manera sostenibel y nan lo bishita un fabrica un nan ta hasi recycling. Nan lo hanja differente workshop tambe over di e chemical structure di plastic y nan lo hanja oportunidad pa conoce y explora e cultura di Austria.

            Esaki sigur lo ta un experencia unico, unda cu tur hende envolvi lo sinja hopi di dje! Un experiencia inolvidable pa e alumno nan di Colegio Arubano. Di awo caba exito na tur e alumnonan cu ta trahando riba e proyecto na Judenburg Austria e siman aki. Por sigui e desaroyo di e proyecto y e intercambionan riba rednan social manera Facebook y Instagram bou di e nomber ‘Deplastify the planet’.