Marisol ta compara e pandemia di covid-19 cu un condom den parlamento di Aruba

Parlamentario Marco Berlis (MEP):

ORANJESTAD (AAN):  Riba Diaranson mainta 9’or di mainta a cuminsa trata e ley di Schenking Qredits Microfinancing Nederland den Staten di Aruba. Por bisa cu oposicion a sali duro pa trata na capitalisa riba un retorica di mentira y manipulacion riba e ley aki.

            Pa pueblo por compronde, e ley aki ta trata un subsidio na Qredits di sumanan di awg 200.000 y 17.000 cualnan ta data di 2020 durante di pandemia, riba 5 di April y 20 di Mei respectivamente.

            Un otro schenking di minister di Economia sr. Geoffrey Wever di awg 123.000, tambe ta encera den e ley aki. E sumanan total di 217.000 florin tabata necesario pa yuda Qredits pa sigui yuda negoshinan cu micro fiansa pa asina nan por a tene nan cabes ariba awa.

            Manera tur otro yudansa cu gobierno a ofrece na comunidad y gremionan esakinan a bini bao di e presion di e pandemia di Covid-19, cu a haci cu nos economia a bay plat completamente. E rapport di IMF ta aplaudi gobierno pa su intervencion rapido cu awe nos tin un economia stabil atrobe.

            Ta pesey e ta di condena cu un persona manera parlamentario Marisol Lopez-Tromp den su discurso den e reunion publico, a sali papia barbaridadnan gigante sabiendo bon kico a sucede cu e schenking aki na 2020 y bao ki circumstancianan esaki a sucede.

            Asina mes Marisol a hunga un politica baho y a ataca ministernan Geoffrey Wever y Xiomara Maduro cu tur sorto di acusacion lubidando pa su gran berguensa lo siguiente;

            Gobierno a saca un documento riba fecha di Juni 1 2020 splicando y informando Staten di Aruba riba tur loke nan ta bay haci pa por acapara y yuda e economia y pueblo di Aruba. E documento aki ta informa Staten den detayes di tur loke gobierno a propone pa bay haci pa alivia negoshinan y e situacion critico na Aruba. Marisol ta haci comosifuera esaki NO ta e caso! Mentira!

            Marisol ta lubida, pa su berguensa, cu e mes tabata minister di infrastructura na Juni 2020 y cu ta e mesun ministerraad aki cu e tabata parti di dje, a tuma e decision pa establece FASE, Loonsubsidie, schenking y tur demas ayudo cu gobierno. Awor Marisol ta pretende cu e “no sa nada”, e no a “aproba nada,” y ta cuestiona “tur cos awor.” Ta abo mes a aproba tur cos Marisol! Marisol mes a aproba tur cos pero pa Marisol e show di hipocresia politico mester continua pa sigui acumula voto.

            Marisol a cuestiona gravemente su mesun gobierno, su mesun funcion, su mesun decision, su mesun ministerraad, y awor ta purba laba man. Tin un acto mas baho y bergonzoso cu esaki? Asina Marisol a sali duro contra su mes pa su propio berguensa!

            Ademas di e actitud bochornoso di incrimina su mes, Marisol tambe a bisa lo siguiente; “kico minister su pensamento ta, cu aworaki cu delaster un cos, delaster un cos, cu no a bin parlamento, tur cos cu sucede cu porta robes cu ta laat, ta pa via di Covid. Covid a para bira manera un condom, tur cos e ta wordo usa pe, anto cu achteraf pa kita consecuencianan cu por tin.” (video di reunion publico nr. 15, minuut 12:12) Covid a bira manera un condom? Really?

            Marisol a lubida cu durante pandemia di Covid mas di 200 hende a perde nan bida, miles di hende a perde trabao, miles di hende a perde cas y auto? Miles di hende a cay den desesperacion y problema di mental health cu a “peak” durante di pandemia?

            Awor Marisol ta pretende cu mester a keda sin yuda, financia y haci loke gobierno a haci pa nos tur por a sobrebibi? Marisol ta ridiculisa e panico y dolor cu e pandemia a causa hopi famia cu a perde nan ser keri? Esaki ta Marisol, ainda por confia y kere den un persona asina aki?