Anuesca Baly, Directora di SKOA:
ORANJESTAD (AAN): Den entrevista cu Matutino DIARIO, directora di SKOA señora Anuesca Baly a declara cu pa locual ta schoolgeld di SKOA e tin tres aña cu ta stabil, kiermen di nan banda, e no a subi.
Pa loke ta SKOA e sumanan di schoolgeld ta: Kleuterschool: 250 florin, scol basico ta 275 florin, pa MAVO ta 350 florin y banda di esey mester pone acerca e 150 florin di aircogeld.
Señora Baly a aclarea loke diferente medio social a publica, cu schoolgeld a subi, pero pa loke ta schoolbestuur di SKOA esey no ta e caso.
“Esaki ta regarda otro schoolbestuurnan y ta comprendible pasobra gastonan ta subi. Hopi biaha bo ta wak riba facebook mayornan of otro hendenan ta haci comentario cu si, con por subi schoolgeld si tin solar panels (entre otro). Pero e ta indica cu pa gastonan di scol nan ta haya cierto suma di gobierno, cu nan ta hay’e como subsidio y den e caso aki loke ta schoolgeld ta cubri e otro gastonan cu gobierno no ta cubri den su subsidio”, señora Anuesca Baly a comenta.
“Manera ta conoci SKOA a gana un caso un par di aña atras unda cu SKOA a bira e unico schoolbestuur cu tin derecho di cobra schoolgeld, mirando locual e Huez a bisa e tempo ey, cu e ta wordo cobra pa subsidia e postnan cu no ta wordo cubri door di gobierno”, el a relata.
El a sigui splica, por ehemplo, cu scolnan cu ta di stichtingnan ta paga coriente na prijs comercial, pues nan no ta haya un prijs preferencial, y mescos ta conta cu pago di awa.
Pa loke ta schoolgeld, Baly a menciona cu ya caba mayornan a cuminza haci e pagonan pa aña escolar 2025-2026, y SKOA su manera di traha ta si t’asina cu ta bay subi schoolgeld, mayornan lo a wordo informa debidamente, adelanta, di esaki.
“Nos ta habri nos aña escolar semper for di 1 di Mei, cu duna oportunidad na mayornan di areglo di pago. P’areglo di pago, mayornan ta haci un peticion; nan ta haya un link y via esaki mayornan mes ta yena cuanto nan ta willing pa paga, pero e quota si ta mara. Esey kiermen e quota maximo ta depende di cuanto yiunan ta na scol. E maximo ta cuater quota”, señora Baly a indica.
El a agrega cu e areglo di pago mester wordo termina prome cu e mucha drenta scol, na Augustus, pa e tin un recibo di pago pa ora cu e drenta. “E pago aki cu tambe ta inclui schoolgeld tambe tin un seguro adicional, pa ora cu e mucha ta sali for di tereno di scol, e ta cubri tambe un seguro.
