Programa Social Work & Development di U.A, a culmina cu canamento di concientizacion

Riba Dia di Derechonan Humano:  --- Nicole Harts, docente di e Programa Social Work & Development, na Universidad di Aruba, den cual e ta duna e curso di Derecho Humano,

a elabora den entrevista cu DIARIO, tocante e culminacion di e curso den forma di un canamento di concientizacion, unda cu nan a para keto dilanti diferente aspecto di Aruba su sociedad, cu mester di atencion.

Harts a splica cu un di e aspectonan aki ta e estado mental di hende homber, unda cu hopi biaha nan mester ayudo profesional, pero nan no ta durf di busca esaki. Tambe abuso di mucha, specificamente negligencia, y ademas concientizacion riba hende grandi na Aruba, cu tampoco ta haya e atencion y ayudo cu nan mester.

Esaki ta algun di e temanan cu cual e studiantenan di SW&D di Universidad di Aruba a cana cune na Caya Grandi, riba Dia Mundial di Derechonan Humano, cu e meta di trece concientizacion.

Un par di studiante a acerca Minister Ursel Arends, y a puntre si nan ta bay trece un cambio den e sociedad di Aruba en general, enfocando riba e tema di personanan cu ta na Aruba sin estadia legal, unda e muchanan no ta haya oportunidad di studia, si e mayornan tambe ta ilegal, y nan mester warda pa e mayor haya un permiso, pa nan por haya un lugar na scol.

E mandatario a bisa nan cu e  ministernan cu tabata presente, entre nan, ademas di su persona e minister di Asunto Social y esun di Enseñanza, ta considera e puntonan cu nan a trece dilanti valido y nan lo percura pa duna esakinan atencion. El a bisa cu henter e gabinete ta para pa igualdad y no ta considera ningun hende ilegal, y nan ta reconoce cu tin un grupo grandi di personanan ilegal na Aruba, y gobierno lo traha pa inclusion, na nan beneficio, y lo zorg pa nan tur wordo trata igual.

El a bisa e studiantenan cu nan por conta cu e Gabinete en general y cu cada un minister. Seguidamente, Minister Rocco Tjon, como titular di Asunto Social a bisa cu netamente e dia ey, Gobierno a prolonga e contrato di Social Crisis Plan, y nan tambe a boga pa e importancia di e trahador social, cu ta e trabao cu nan ta studiando pe.

E mandatario a bisa cu salud mental ta un parti chikito di henter e cadena di sector social, pero e tin e dignatario su atencion y pesey diferente acuerdo a wordo cera e siman aki, pa asina percura cu nan partnernan den Reino duna mas atencion na e aspectonan di salud mental, haci e cuido mas accesible y hunto tur hende cu ta brinda Aruba desde esnan di e cadena hudicial te esnan di e cadena social, haya e conocemento riba e materia aki y pa di e forma ey percura pa kita e tabu riba salud mental, y ora un persona mester di ayudo riba e tereno aki, sinti su mes liber di busca esaki, si e cuido ta accesible.