Programa nobo na TV ‘Den Nos Bario’ enfocando riba historianan indocumenta di distritonan

Estreno ta Diabierna awor na Telearuba

ORANJESTAD (AAN): E produccion cu lo wordo lanza Diabierna 6 di November 2026, via di Telearuba ta “Den Nos Bario”.

   E ta un proyecto cu a cuminza tres aña pasa, y via e programa ta bay documenta historia oral, historia cu ta bay perdi.  Hopi di nan ta documenta, pero nunca a sali na luz di dia.

   Segun e presentador Siomara Everon, e programa yama ‘Den Nos Bario’, pero realmente e ta di cada distrito.  Nan a cuminza cu San Nicolas como 3 aña pasa, y awor nan ta na Noord, unda lo saca tres programa cu ta conta di e historia Noord, pues su hendenan, su comienso, y ta e parti primario di historia, bay ta bay na parti social-economico di e distrito.  Tambe ta enfoca riba personahenan iconico di Noord, pasobra realidad di bida ta cu den cada distrito bo ta topa cu hendenan iconico kendenan ta conta loke nan ta, y kico a haci nan sobresali den nan distrito.

   “Den Nos Bario” ta un programa crioyo, y ta bay cubri tur distrito.  E programa lo bay den aire Diabierna anochi pa 7:00 pm via Telearuba.  Despues bo por mira e episodionan cu bo no a mira, via YouTube.

   E programa ta wordo edita y ta inclui aspecto di A.I., efectonan di sonido, rebiba potret- y escenarionan di casonan di historia.  Incluyendo lo papia di e famoso caso di ‘Pedro Mata Cuatro’ na Noord, cu den un epoca tabata un storia espantoso y increibel pa nota cu el a socede na Noord.  Tambe lo papia unda Noord ta para awendia unda e ta como distrito.

   A ser splica, cu A.I. lo wordo uza pa crea imagennan pa cierto relatonan, unda ningun potret ta existi.  E ta djis wordo uza pa trece un perspectiva con cierto cosnan a socede, of e estilo di bida di antes.

   E ta un produccion costoso, pero a haya sosten di UNOCA, como tambe di Aruba Tourism Authority debi cu e plan ta pa 2027 pone sub-titulo na ingles riba e videonan aki pa asina bishitantenan tambe por mir’e y conoce mas di e historia di e isla.

   Productornan ta gradici tur media cu a yuda nan, pa asina e material, documental, educativo, cultural, y historico tin un aporte grandi den historia di Aruba, pa e relatonan aki no bay perdi.