Ministro Gerlien Croes a indica claramente
- Sugeri pa sinta bek cu gremionan
ORANJESTAD (AAN): Cada dos siman, Ministronan ta acudi pa un reunion cerca Gobernador Alfonso Boekhoudt pa un audiencia, pa duna informacion di desaroyonan.
Riba Diamars, ora cu Ministro Gerlien Croes a acudi cerca Gobernador, na su salida a topa cu prensa cu a haci’e varios pregunta principalmente riba supuesto friccion cu Partido Futuro tin cu nan partner di coalicion, esta Partido AVP.
Y aki el a mishi cu e asunto di aumento di Salario Minimo pa e bay wordo liga cu e Bestaansminimum. Y peor cu awor tur cos riba e isla a bira caro.
Varios persona na Aruba a tuma nota con Prome Ministro a bay check opinion di expertonan na Hulanda riba e idea di conecta Salario Minimo na Bestaansminimum, y ta tur a dune luz berde. Pero a lubida cu Hulanda ta un pais cu ta productor cu hopi industria cu por sostene.
Ministro Gerlien Croes awor a bisa cu tur hende tin di realiza cu Aruba ta un isla cu ta importador! Prijs ta subí ora cu e prijs di container subi, tur cos ta sigui bay di un efecto y na final di dia pueblo ta paga pe. “Nos como gobierno tin cu sa di tuma e decisionnan gubernamental pa mitiga e impacto na pa cada hende na Aruba,” Ministro a declara.
El a mustra cu mitigamento di e impacto aki tin diferente manera pa haci esaki. E por ta entre otro, bo ta introduci reforma fiscal, cual ta un topico cu AVP y Futuro a acorda den acuerdo di gobernacion, a papia di dialogo fiscal pa kita e BBO y bin cu un algemeen belasting. Cual ta un trabao cu Ministro Geoffrey Wever ta trahando riba dje, y ta wardando algun rapport keda cla, pa sigui cu ne.
El a bisa cu ultimo 3 pa 4 lunanan, Premier Eman a infroma cu e tin deseo pa traha riba aumento di sueldo minimo. Partido Futuro a haci pregunta ta con leu ta cu e dialogo cu e Gremionan.
Na momento cu bo ta introduci e aumento di salario minimo, sintando cu Gremio na mesa, algun di nan sigur por carg’e facilmente, negoshinan grandi kizas Hotelnan, pero tin di papia cu nan. Corda cu tin hopi negoshi chikito y mediano, cu lo bisabo cu nan lo enfrenta hopi mas gasto fin di luna, y no ta haya un manera pa baha nan gastonan por medio di cambio di fiscal, kizas baha belasting, sino nan lo pusha e gasto di salario minimo den prijs.
Sinta bek cu Gremionan: Si negoshinan haci esey, pa Ministro Gerlien Croes e ora ta tur cos ta bira mas caro. “Pues nos punto di salida ta, nos ta contra ningun aumento, pero Aruba no mag di bira mas caro. Aruba no mag di bira mas costoso. Aruba no mag di bira impagabel. E ta caro caba,” Ministro a indica.
E lider di Partido Futuro a comparti nan deseo pa sinta, y no ta costa nada pa bolbe haci e intento ey, principalmente si bo mester di bo Gremionan pa yuda bo decision aki.
Cu e punto di salida aki, el a splica cu ta un bunita momento pa papia cu e Gremionan riba otro tipo di topiconan tambe kizas, pues papia di biaha di cualkier cambio fiscal of algo cu por yuda Gremionan tambe, cu ta mitiga e peso cu nan ta carga. Sigur kier yuda e grupo aki, y kier yuda tur otro grupo, pues no kier pa ningun hende di ningun forma wordo perhudica, e ta e realidad. Pues pa Ministro Gerlien Croes, nan ta bisa pa traha riba esaki y sinta na mesa bek cu e Gremionan.
