Famianan a haya informacion practico relaciona cu sosten financiero pa muchanan cu necesidad intensivo di cuido

Famianan a haya informacion practico relaciona cu sosten financiero pa muchanan cu necesidad intensivo di cuido

ORANJESTAD (AAN): Minister di Salubridad, Asunto Social, Cuido di Adulto Mayor y Maneho di Adiccion, sra. drs. Melvin G. Wyatt-Ras,

hunto cu Minister President Mike Eman, a tene un sesion informativo diamars 3 di november na YMCA San Nicolas, como e prome di dos sesion dedica na e proposicion di ley Landsverordening tegemoetkoming voor kinderen met intensieve zorgbehoefte.

E sesion tabatin como obhetivo acerca informacion na famianan y mantene contacto directo cu comunidad tocante e sosten financiero pa muchanan cu necesidad intensivo di cuido.

Durante e sesion, a brinda un splicacion di e proposicion di ley, incluyendo e sosten financiero, e rekisitonan pa cualifica, e proceso di evaluacion y con e proceso di peticion lo funciona. E participantenan tambe a haya oportunidad pa haci pregunta y haya informacion adicional directamente di e representantenan involucra.

Segun e proposicion di ley, famianan cu ta cualifica lo por ricibi un contribucion mensual di Afl. 500 belastingvrij pa cada mucha menor di 18 aña cu necesidad intensivo di cuido. E sosten aki ta destina pa yuda famianan cu ta enfrenta responsabilidadnan y gastonan adicional relaciona cu cuido y supervision di nan yiunan.

Rekisitonan y proceso di evaluacion

Durante e presentacion a splica cu e necesidad di cuido intensivo no ta determina solamente pa medio di un diagnosis medico, sino tambe segun e grado di cuido y supervision cu e mucha mester den su bida diario. Un di e puntonan trata tabata cu no ta necesario pa e mucha y su mayornan tin nacionalidad Hulandes pa por cualifica. Sin embargo, nan mester cumpli cu e

rekisitonan di estadia legal na Aruba y ta inscribi na Censo. Tambe a splica cu pa muchanan menor di 3 aña, lo mester un declaracion di un pediatra. Pa muchanan cu a wordo evalua caba door di Bureau MDC y cu tin un conseho pa educacion special (ZMLK of cluster 4), no ta necesario un conseho adicional di e Comision di Indicacion.

Ademas, a brinda informacion tocante e rol cu Departamento di Asunto Social (DAS) y e Comision di Indicacion lo tin den e proceso di evaluacion y decision.

Demostracion di proceso di aplicacion online

Durante e sesion, a demostra con e proceso di aplicacion online ta funciona, incluyendo e formulario di peticion y e cuestionario di indicacion. Esaki a duna mayornan un idea di e informacion y documentonan cu nan por cuminsa prepara di antemano, manera documentonan di identificacion, informacion di contacto y rapportnan medico y di scol cu por yuda splica e necesidad di cuido diario di nan yiunan.

E demostracion tabata destina pa orienta famianan y prepara nan pa momento cu e ley drenta na vigor.

Dialogo cu comunidad ta continua na Paradera

Minister Wyatt-Ras y Minister President Mike Eman ta invita comunidad pa e segundo sesion informativo, cu lo tuma luga diahuebs 5 di november 2026, di 7:00 PM pa 9:00 PM, na MFA Paradera. Durante e sesion aki, famianan lo haya oportunidad pa ricibi informacion tocante e proposicion di ley y haci pregunta directamente na e representantenan involucra.

Ainda tin espacio disponibel. Personanan interesa por registra mandando un e-mailna This email address is being protected from spambots. You need JavaScript enabled to view it., mencionando nan nomber y cantidad di persona cu lo participa.

E proposicion di ley a wordo entrega na Parlamento di Aruba dia 2 di November 2026 y ainda mester pasa door di e proceso di tratamento parlamentario prome cu por drenta na vigor.