Programa educativo 'BeYourOwnBoss' ta pa stimula entrepreneurship entre hobennan

Qredits Aruba y Aruba Airport Authority N.V.  

ORANJESTAD (AAN): Riba 25 di september, e programa educativo “BeYourOwnBoss” a wordo inicia pa e aña escolar 2025 – 2026. Un total di 260 studiante di MAVO y HAVO, entre e edad di 13 – 17, ta participa den e programa, cu e enfoke riba habilidadnan clave pa futuro. 

E programa ta un colaboracion entre Qredits Aruba y Aruba Airport Authority N.V., caminda ta fortifica e continuidad di e programa aki. 

Durante e proyecto aki representantenan di Qredits Aruba y Aruba Aiport Authority N.V. lo bishita tur scol participante pa duna presentacion tocante tema importante relaciona cu “entrepreneurship” y desaroyo personal. 

E tema y su meta primordial ta pa stimula  “Entrepreneurship” den un forma interactivo y practico. E programa educacional ta invita e studiantenan pa eleva nan idea di negoshi, promoviendo inovacion y tambe desaroya nan habilidadnan manera resolve problema, siña traha como team, como tambe comunicacion.

Por medio di tareanan practico studiantenan tambe lo siña con pa haci un sondeo di e mercado local. Na final tur studiante lo haya e oportunidad pa presenta nan propio idea di un producto of servicio durante e “Pitch Event”. 

Qredits Aruba y Aruba Airport Authority N.V. ta desea tur e ocho (8) scolnan participante, studiantenan, docentenan y cabesantenan, tur clase di exito cu e programa educacional aki. 

E scolnan cu ta participa ta: Commandant Generaal Abraham de Veer, Colegio San Antonio, De Schakel College (MAVO y HAVO), Educampus Aruba, Filomena College, Maria College y Colegio Nigel Matthew (HAVO). 

Un danki special ta bay na Aruba Aruba Airport Authority N.V. pa sponsor e proyecto aki y pa nan cooperacion valioso, cu lo tin un impacto positivo riba e studiantenan y nan preparacion pa un futuro exitoso. 

como parti di nos compromiso cu empoderacion y innovacion di hubentud na Aruba. Door di curasha e studiantenan pa explora e retonan di mundo real, nos tin como meta pa lanta pensamento creativo y inspira nan pa un dia contribui na e industria di aviacion, sea pa medio di un carera na aeropuerto of door di desaroya productonan y servicionan innovativo cu ta forma su futuro”, tabata palabra di Barbara Brown, Chief Revenue Development & Communications Officer na Aruba Airport Authority N.V. 

“Na Qredits Aruba, nos ta mira empresario como mas cu djis cuminsa cu un negoshi, e ta mas bien tocante construi confiansa, soluciona problema y pensa creativamente.  E programa “BeYourOwnBoss” ta trece e studiantenan mas cerca di e realidadnan di empresario, mientras cu ta mustra nan tambe con nan ideanan por impacta nos comunidad positivamente. Door di ekipa e hobennan cu e habilidadnan aki trempan den nan bida, nos ta duna nan e fundeshi pa triunfa den cualkier carera cu nan scoge y nos ta inspira nan pa soña, crea y lidera. Door di inverti den e hobennan di awendia, nos ta yuda pa forma e innovadonan y lidernan di mañan”, Nathaly Harms, Branch Manager di Qredits Aruba. 

Qredits Aruba ta bon conoci den sector empresarial pa sostene empresarionan cu microfinanciamento di te cu Afl. 200.000,- pa cuminsa y crece nan propio negoshi. Qredits Aruba tambe ta sostene empresarionan pa medio di coaching, recurso y programanan educativo.