Prome edicion di ‘Savaneta Seafood Festival 2025’ tabata super exitoso

Un Diadomingo yena cu sabor y ambiente

ORANJESTAD (AAN) Diadomingo 28 di September a tuma lugar e tan spera “Savaneta Seafood Festival 2025” como iniciativa di Fundacion Savaneta Prome Capital, cu a tuma lugar den e area Arena, dilanti di e pier ex-Brisas del Mar.

   Un logro inmenso pa e Fundacion, cu colaboracion di CEDE Aruba, Oficina di Turismo, sin laga afo e sosten di Ministerio di Economia y Finanzas lidera pa Minister Geoffrey Wever; varios boluntario tabata presente set up tur cos na un manera formidable, y e bishita di un publico consumidor cu a purba diferente plato di cuminda di lama, logicamente a base di pisca fresco. Un festival di cual a goza no solamente e habitantenan di Savaneta, su alrededor y y di San Nicolas y tur lugar di nos dushi Isla, y sigur e turistanan, ya cu casualmente Diadomingo un crusero grandi a bishita Aruba, y sin duda a tende di e tremendo festival aki.

Sigur un bunita forma di promove Aruba y e Distrito di Savaneta, cu a presenta su esencia autentico, su cultura, su alegria y su gran anhelo di progreso promovi semper pa Fundacion Savaneta Prome Capital. Pa 2’or di atardi tabata tin un tremendo torneo di Pesca y tambe a tuma lugar e firmamento di Minister Geoffrey Wever, pa cuminza e renobacion di e pier di Savaneta.

   Ambiente di alegria, cu musica en bibo no a keda atras, y pa finaliza por a mira un publico anima ta balia bao ritmo di musica di Carnaval. Pabien Savaneta, y Fundacion Savaneta Prome Capital y su tremendo ‘Savaneta Seafood Festival 2025’ lidera pa señor Norman Thijsen.