Parlamento di Aruba mester atende e situacion regional cu a presenta
*For di Chavez uni na Fidel Castro tabata tin peligro pa teritorio Aruba
*Nicolas Maduro por controla Milicia Venezolano desespera y activa?
ORANJESTAD(AAN)—“Invasie” tabata nomber di un pelicula Hulandes, cu a mustra con un poder stranhero a ataca y apodera su mes di un isla. E pelicula a causa basta reaccion debi na e hecho cu a filma e espectaculo na islanan Hulandes y a expone e posibilidad di e peligro.
Loke no a haya tanto interes tabata e realidad cu den pasado e islanan Hulandes dilanti costa di Venezuela a wordo prepara p-a un posibel invasion.
Na 2006 un ehercicio militar importante, cu a haya enomber di Joint Caribbean Lion a tuma lugar den region di Caribe.
Hulanda, Estados Unidos, Reino Uni (Inglatera) y Francia, a uni den e ehercicio, cu a dura mas cu cuatro siman y a sirbi e proposito pa dicidi con for di Europa por a percura pa asistencia militar y conkista un isla den Caribe.
E ehercicio aki tabata tin un motibo hopi importante debi na e peligro cu a presenta su mes den e accionnan di e Presidente Venezolano di e tempo, Hugo Chavez, cu a asumi poder como Presidente di Venezuela ora siglo 20 a conoce su final.
Chavez cu tabata directamente mara na e movecion socialista y tabata tin su sosten grandi den Fidel Castro, tabata di opinion cu e islanan Aruba, Bonaire y Curacao tabata parti di Venezuela y cu e mester a restora e loke e tabata considera union.
Na e momento cu Chavez tabata haci e expresionnan, pues na inicio di Siglo 21, cu ayudo di Spaña y Rusia, el a cuminsa amplia su poder militar .
Esaki na momento cu Hulanda a cuminsa baha su gastonan militar loke a haci cu Reino Hulandes mester a uni su mes na otro paisnan pa tene un accion militar den cual a train pa libera un pais den region Caribense.
Ta den e tempo aki a cuminsa tambe cu mas accion contra droga na e parti aki di Reino cu a conoce e centronan di Forward Operating Location na aeropuertonan di Aruba y Curacao, loke no tabata di agrado di Venezuela, cu a haya su mes confronta cu dos base Americano dilanti su porta.
E relacion entre Reino Hulandes y Estados Unidos cu Hugo Chavez a empeora y a haya continuacion cu entrada di Nicolas Maduro cu a duna continuacion na e estado socialista di Venezuela cu a bira un fortaleza pa Rusia den region di Caribe.
Venezuela pa medio di Maduro a sigui cu e insistencia cu Aruba ta parti di teritorio Venezolano.
Entrada di Citgo na Aruba, a habri porta pa Gobierno Venezolano presenta su mes como empresario di e compania cu mester a bira central den economia di Aruba.
Presencia di Hugo Carvajal , cu a fungi como dirigente di Servicio Secreto di Venezuela, a bira un incidente internacional, cu a termina cu su salida como persona non grata for di Aruba.
E peligro di Aruba den porta di Venezuela, cu nunca a bandona su obstinacion enfrente Aruba, a bira mas grandi mientras situacion mundial a empeora y mas y mas Nicolas Maduro a entrega na mundo e prueba cu e no ta hala atras den su exigencianan.
Esaki sigur a bini dilanti den su accionnan pa exigi Essoquibo como parti di Guyana y hasta tene eleccion na Venezuela pa loke e ta considera representantenan politico di Essoquiibo.
Na e momentonan aki mester papia di tensionnan serio entre Merca y Venezuela dilanti porta di Aruba, cu manera informantenan a mustra por escala den un situacion regional serio.
Tur informacion ta indica cu Venezuela ta prepara su mes pa accion militar serio, cu por tin resultado grandi teniendo cuenta cu e relacionnan directo entre Venezuela, Rusia y otro paisnan comunista tanto den region di Caribe como pafor di e region.
E peligro mas grandi cu informantenan ta mira, ta e realidad na Venezuela mes caminda Nicolas Maduro ta activa milicia Venezolano, cu tin duda cu realmente e por controla.
Manera a bini dilanti, un grupo grandi di Pueblo Venezolano ta consisti di desesperado cu a mira e pais bira un centro di desesperacion humano, cu un grupo enorme di Venezolano a bandona.
Na mes momento tambe mester tene cuenta cu Venezuela a bira un baluarte pa Rusia y otro podernan comunista.
Informantenan ta indica, cu den porta di Aruba mas cu un incidente regional a desata ya cu na e momentonan aki, interesnan internacional ta uni na otro riba diferente tereno.
E pregunta serio ta keda si Maduro realmente por controla milicia cu e mes a activa na un pais rico cu el a reduci na pobreza maximo.
Di otro banda mester tene cuenta cu e cantidad di interesnan stranhero cu a trece trahadornan cu no ta di Venezuela y cu ta sostene regimennan totalitario cu lazonan importante cu Venezuela.
DIARIO ta sigui tur desaroyo pa por informa Aruba, cu ta conta cu e proteccion di Reino Hulandes den e situacion regional.
