Proceso ta andando pa rediseño y planificacion di ex edificio di DOW

Marc Figaroa di APA:

ORANJESTAD (AAN): Marc Figaroa, director di Aruba Ports Authority NV (APA), a duna di conoce cu nan a publica caba e 'Request for Proposal' (RFP) caminda ta pidi ofertanan pa sigui cu e diseño final di e ex edificio di DOW na Paardenbaaistraat.

            El a bisa cu den e proximo simannan, e arkitectonan local cu ta interesa pa entrega oferta pa haci e diseno y planificacion di esaki por registra pa asina sigui pa e siguiente fase.

            Segun Figaroa, kier haci e 'groundbreaking' ainda e aña aki. Ta premira cu ta bay dura un aña pa un aña y mey masomenos pa esaki finalisa completamente.

            Relaciona cu e edificio, el a splica cu APA ta bay muda eynan como su oficina principal pa alberga e parti administrativo y di maneho. E edificio actual ta birando chikito door cu e organisacion ta creciendo y ta trece e experticio cu mester 'in house'.

            APA a haya oportunidad pa inverti den un edificio cu tin hopi tempo bandona y conhuntamente cu Oficina di Turismo lo tin e parti monumental, cual ta e edificio primario, y cu lo bira e 'visitor center' \.

            APA ta purbando di bay den un crecemento caminda ta enfoca mas riba, digitalisacion, riba crusero y temporada abao. Durante e temporada halto ta na un capacidad cu no kier bay expande mucho mas. E unico dianan cu por acomoda un barco den 'high-season' ta den fin di siman. Pero ta net e dianan cu mayoria di biaha nan ta sali di nan 'homeport', manera Miami, Fort Lauderdale, of otro islanan den Caribe, el a bisa.

            Si ta mirando un crecemento den  e 'low-season'. Comparando esaki cu aña pasa, tin un crecemento marginal, pero e ta positivo, Marc Figaroa a finalisa bisando.