Parlamentario Rocco Tjon:
ORANJESTAD (AAN): Parlamentario di MEP Rocco Tjon durante un conferencia di prensa a papia riba KIA. El a splica cu e prison ni ta den bon estado pa loke ta e infrastructura.
“Loke nos a laga atras ta un acuerdo cu Hulanda y cu UNOPS, cu ta un organizacion di Nacionnan Uni cu ta yuda paisnan diseña un prison, esta con un prison mester mustra y con e diseño mester ta pa e cumpli cu tur rekisito”, segun e parlamentario.
Tjon a sigui bisa cu gobierno anterior di MEP a bay laga atras tur e acuerdonan, incluyendo un compromiso di Hulanda cu nan ta financia full e trayecto aki.
“Mi mester bisa cu den e presupuesto supletorio cu nos ta bay trata aki poco tempo, nos a ripara tambe cu e placanan aki a yega y aworaki nan ta firma parti tambe di e presupuesto”.
Pues esey ta loke nos a laga atras, pues unabes cu e diseño keda cla y ora cu nos sa cu esaki ta e prison nobo con e mester mustra, e ora ey Gobierno lo mester tuma e decision con ta bay financia esaki.
Nos ta basta mas leu cu nos tabata, pasobra antes tur hende tabata puntra con ta bay financia esaki, segun Tjon.
El a splica cu aworaki a logra yega na e compromiso y e convenio firma cu ta bay diseña un prison nobo y ora cu esey ta cla nan por haci e calculacionnan tambe pa wak cuanto esaki ta bay costa, pa e gobierno actual dicidi con ta bay financia esaki.
