Aeropuerto di Aruba a logra e prestigioso LEED Gold Certification

ORANJESTAD (AAN):  Aruba Airport Authority N.V. (AAA) ta orguyoso di anuncia cu Queen Beatrix International Airport (Aeropuerto di Aruba)

su proyecto di expansion di terminal Gateway 2030 Fase 1A (GW 2030 Fase 1A) a logra e distinguido LEED Gold Certification como e ‘Prome Terminal di Aeropuerto den Caribe’ y e ‘Prome edificio nobo certifica di LEED Gold’ na Aruba. E logro aki ta marca un logro significante den e compromiso di aeropuerto pa crecemento sostenibel y cuido di medio ambiente. 

Pa conmemora e logro remarcabel aki, Aeropuerto di Aruba a tene un recepcion chikito riba diahuebs 26 di juni. E evento a conta cu presencia di mr. Wendrick Cicilia, Minister di Turismo y Labor, e Miembronan di Supervision di Directiva di Aruba Airport Authority N.V. y e empleadonan di Aeropuerto di Aruba cu a contribui na realisacion di e certificacion aki. Durante e recepcion a reconoce e esfuerso colaborativo y e vision comparti cu a haci e logro aki posibel, reenforsando e rol di Aeropuerto di Aruba como lider den infrastructura di aviacion sostenibel den Caribe.

E certificacion LEED (Leadership in Energy and Environmental Design) ta un simbolo reconoci di excelencia mundialmente den e edificionan berde. LEED Certification ta provee un structura pa e edificionan berde, eficiente y cu ta spaar gasto, cu ta ofrece beneficionan ambiental, social y di maneho. Pa logra e LEED Gold Certification por score un posibel 60-79 punto di cual Aeropuerto di Aruba a logra 68 punto.  

GW 2030 Fase 1A ta encera un expansion di 14.250m2 di e terminal di pasahero di salida di Merca, incluyendo un sala nobo di check-in, baggage hall y oficina di compania di aviacion. Durante henter e proyecto, a implementa un cantidad di diseño y innovacion. E metricanan y e medidanan clave sostenibel di GW 2030 Fase 1A ta inclui: 

• Eficiencia di energia: 48% menos demanda di energia compara cu e edificio di terminal existente, cu 5% di energia renoba produci na e sitio.
• Conservacion di awa: 24% menos demanda di awa y no ta haci uzo di awa potabel pa irigacion.
• Maneho di desperdicio: A desvia mas cu 57% di e desperdicio di construccion genera for di e terenonan di destruccion.
• Materialnan: Uzo di contenido recicla y materialnan natural pa mehora e calidad di aire paden y rendimento ambiental.
• Transporte: Ta provee ​​stacionnan di combustibel alternativo (charger EV) pa 5.35% di e capacidad total di auto staciona y e vehiculonan cu ta emiti menos emision.
• Energia alternativo: Panelnan solar y compra di energia berde.
• Calidad di medio ambiente paden: Ventilacion controla pa demanda, iluminacion LED, y materialnan cu tiki VOC pa un clima saludabel paden. 

Aeropuerto di Aruba ta hunga un rol crucial den conecta e isla cu mundo y impulsa crecemento y desaroyo economico pa e comunidad local pa medio di turismo y creacion di cuponan di trabou. Reconociendo e importancia di desaroyo sostenibel, Aeropuerto di Aruba a lansa e proyecto Gateway 2030 Terminal Expansion pa atende limitacionnan di capacidad y sigura crecemento den futuro na un manera responsabel pa medio ambiente. 

Un compromiso cu futuro 

Cu finalisacion di GW 2030 Fase 1A, Aeropuerto di Aruba a haci pasonan significativo pa crea un aeropuerto berde y sostenibel. Pa medio di un colaboracion fuerte entre Aruba Airport Authority N.V. y Netherlands Airport Consultants, a sigura e integracion di principionan di diseño innovativo y sostenibel pa cumpli cu e LEED Gold Standards door di e organo di certificacion di LEED (USGBC). E proyecto di expansion di Terminal Gateway 2030 lo sigui expande, cu fasenan siguiente cu ta andando caba y cu e meta pa mas certificacion di LEED. 

Angeline Flemming, Director of Health and Sustainability a expresa: “E logro historico aki ta posibel door di e dedicacion y compromiso di henter e compania y ta subraya e compromiso di AAA cu sostenibilidad, door di prepara y ehecuta e proyectonan na un manera responsabel. AAA ta bon consciente di su responsabilidad pa opera na e manera mas sostenibel posibel, cu ta inclui mantencion di facilidadnan y mantencion na e facilidadnan di aeropuerto." 

 “Diseña y construi facilidadnan basa riba principionan di Leed ta duna nos team guianan cla pa inclui e principionan di eficiencia y sostenibilidad for di trempan den nos proyectonan. Como compania, nos ta comprometi na baha nos comsumo di energia y awa y construi segun e principionan aki ta garantisa resultadonan positivo”, asina Gilbert Rafael, Chief Development & Technology di AAA a expresa.