Privatizacion di Parlamento ta importante mirando cu 1 Januari 2026 ta 40 aña di Status Aparte

Presidente di Parlamento Marlon Sneek:

• Tambe 40 aña di Parlamento di Aruba 

ORANJESTAD (AAN) Presidente di Parlamento, señor Marlon Sneek a duna di conoce cu e Reglamento di Orden di Parlamento ta algo cu nan a traha riba dje caba y e ta na Directie Wetgeving, y lo bin Parlamento pa nan por atende cu e comentarionan cu e lo bin cu ne.

   E ley mes ta den proceso pa nan mande Wetgeving pa caba di pone den otro manera mester ta, unda mester haci cambio haci esakinan, mande pa Raad van Advies, pa trate oficialmente den Parlamento pa por bay over na e fase ey.

   Sneek a agrega cu tambe e mas importante ta cu mester wak e personal cu Parlamento tin, pasobra a wordo haci un assessment tocante kico ta e diferente experticionan cu mester tin den Parlamento, pa e por funciona tambe como tal.

   “Pasobra no ta simplemente bo a traha e ley, e ta independiente, pero bo no a zorg, por ehemplo, pa e tin suficiente hurista. E no por deliver locual bo mester pa deliver”, Presidente di Parlamento a señala.

El a agrega cu esaki ta importante pa Parlamento tambe, cu nan por garantiza tambe cu Parlamento haya locual mester pa e por funciona manera mester ta y duna e calidad cu ta spera di dje.

   “Esaki sigur ta algo importante pa atende mirando cu 1 di Januari 2026 nos lo ta papiando di 40 aña di Status Aparte y 40 aña di Parlamento di Aruba. Pasobra hopi biaha tin hende ta wak den direccion di e ministernan. Pero no lubida cu na Aruba, loke nos tin ta un eleccion pa Parlamento”, Sneek a remarca.

El a agrega cu no tur ora Parlamento ta den e luz cu e mester ta, hopi biaha e ta den e di dos lugar, pero ta lubida cu Parlamentarionan ta wordo scoge y e Parlamentarionan ey ta forma e gobierno y ta saca e ministernan.

“Ami ta kere cu esey ta algo cu mester pone mas atencion riba dje tambe, y lo ta bunita si lo por caba cu trabao, y laga nos bisa y bin cu un cuadro di celebracion di 40 aña di Parlamento di Aruba”, Presidente di Parlamento, Marlon Sneek a señala.