ORANJESTAD (AAN): Organizacion Estadonan Americano (OEA) a scoge diadomingo na Washington e diplomatico colombiano Laura Gil como Subsecretario General di e organismo.
Esaki ta e prome biaha cu un hende muhe ta ocupa e puesto importante aki.
E puesto di Subsecretario General ta e di dos mas halto den e organisacion cu a wordo funda den aña 1948. Den caso cu e secretario general no por cumpli cu su funcion, Gil lo por tuma e rol.
Laura Gil lo tuma e lugar di Néstor Méndez dia 17 di juli 2025, y lo traha hunto cu e secretario general nobo, Albert Ramdin di Surinam, cu a wordo eligi na maart.
Ramdin lo reemplasa e uruguayo Luis Almagro, cu su periodo ta termina dia 25 di mei.
Gil a wordo elegi den un segundo ronda cu 19 voto di e 34 paisnan cu tin derecho di voto. E mester a haya minimo 18 voto pa gana.
E tabata competi contra dos otro hende muhe: Ana María Sánchez di Perú y Claudia Escobar di Guatemala. Gil, ex-viceministro di Asunto Multilateral y actual embahador di Colombia na Austria, a keda den e prome ronda cu e mayoria di voto y den e segundo ronda a gana di Sánchez cu 19 voto contra 13. E mandato ta pa cinco aña, cu posibilidad pa un reeleccion.
Como subsecretario general, e lo tin encargo di temanan social, politico y economico, coordina actividadnan, tuma parti den decisionnan y dirigi misionnan diplomatico na pais miembro.
E di 57 sesion extraordinario di e Asamblea General di OEA tabata dirigi pa representante permanente di México, Luz Elena Baños, cu a yama e eleccion di un hende muhe un "momento historico" y un prueba di e compromiso di e pais miembro pa igualdad di genero.
OEA, cu ta e organismo regional mas bieu di mundo, tin como meta pa logra un orden di paz y husticia, fomento solidaridad, fortalece colaboracion y defende soberania, integridad teritorial y independencia di su miembronan.
