Lisanne Sambo, director Realign Coaching:
ORANJESTAD (AAN) Señora Lisanne Sambo-Gomez, directora di Realign Coaching, den entrevista cu DIARIO, a expresa cu cada studiante tin su mesun preguntanan, mientras algo hopi crucial ta cu e reglanan, e departamentonan, e paisnan y aki na Aruba, constantemente ta cambia.
“Dus, hopi biaha ta sumamente importante pa keda up to date, wak con esaki ta, kico mester haci y hopi factor ta bin acerca, vooral si ta den examen klas. Aki dos siman nos studiantenan ta cuminza cu examen. Nan tin hopi cos na cabes y e ora ey ta bira mucho hopi pa prepara nan mes bon, pa e siguiente fase”, señora Sambo-Gomez a bisa.
Realign Coaching ta prepara tur studiante cu ta aplica pa Aruba Lening, pero no necesariamente esnan cu lo bay studia afo so. Nan ta wordo prepara pa e stap cu nan ta duna pa e siguiente fase di estudio. Esaki ta rekeri un tiki mas training di e studiante mes, otro mentalidad, con e ta deal cu enseñanza, y ta bin diferente aspecto cu ta hunga un rol manera nan dedicacion, documentonan cu nan tin cu regla, y tambe p’e ta bon informa, pa e decisionnan cu e tin cu tuma na caminda ta riba un bon base.
“Nos tin casi 18 aña cu experiencia riba e parti aki, y studiantenan cu ta bay na diferente caminda y tambe esnan cu ta drenta den e mundo di labor, cada un ta rekeri su mesun specialidad. Atrobe, esey ni un studiante ta want’e at all.
E manera con nos ta pak’e aan, ta cu nos laga cada studiante wak nos tayernan y traha riba su mesun plan, cu ta specialmente pa su mes por prepara miho posible pa su siguiente paso”, Lisanne Sambo-Gomez a remarca.
El a agrega cu nan tin un tayer cu tambe ta involucra mayor, pasobra tambe ta hopi importante pa esnan rond di e studiante semper kier lo miho p’e. “E falta di informacion tin ora ta haci cu nan no sa cual ta e miho manera, nan no por sostene y con por yuda e studiante hopi miho. Y tin ora tampoco e studiante sa con pa pidi’e. Nos tin tayernan pa purba haci e brug ey mas chikito y haci’e mas exitoso pa nan, pasobra e ta proba cu miho bo ta informa y realiza bo mes kico tur ta spera bo ta cuminza mas trankilo y bo chens pa exito ta mas grandi”, señora Lisanne Sambo-Gomez, directora di Realign Coaching a señala.
