Prinses Beatrix a bay mira muchanan hunga na Neftali Henriquez Park

ORANJESTAD (AAN): Pa hopi tempo caba, esta for di aña 1980, Prinses Beatrix ta dama protectora di e organisacion di Jantje Beton. 

Y riba Diahuebs na su yegada na Aruba, el a bay haci bishita na Neftali Henriquez Park pa mira ki posibilidad tin riba e isla aki, pa muchanan por hunga y disfruta den aire liber.

   Na e parke aki cu ta keda cerca di beach di Surfside, el a bin topa cu muchanan di scol basico pa asina haya sa kico nan ta haya ta fantastico pa haci pafo den aire liber na Aruba.

   Tambe el a tende mas di e trabao di Jantje Beton na Aruba tambe.  Na su yegada el a topa cu monton di mucha, tur di nan bisti cu T-shirt color oranje cu e emblema di Jantje Beton patras, y dilanti cu e lema “Ik Stop Nooit Met Spelen”, pues e muchanan aki hamas lo stop di sigui hunga pafo.

   Hecho ta cu e organisacion di Jantje Beton kier renoba tur hardin di hunga den Caribe Hulandes, entre otro esnan na Aruba.  Prinses Beatrix a bin mira e parke di hunga aki di Neftali Henriquez como ehemplo di esey.

   Director di Jantje Beton, Dave Ensberg-Kleijkers a duna guia na Prinses Beatrix na e parke.  Despues el a bay papia cu algun alumno di Reina Beatrix School y tambe St. Paulus School.

   Y e muchanan a splica loke nan ta gusta haci na Aruba, principalmente landa na lama, core bicicleta, y tambe rollerblades.