Eerste Kamer a expresa elogio pa cu e maneho financiero responsabel di pais Aruba

Durante e reunion cu Eerste Kamer 3 punto a resalta

• Ainda nan ta papia di welga di hamber di Mike Eman 

ORANJESTAD (AAN): Durante su bishita na Hulanda, Prome Minister Evelyn Wever-Croes a tuma e oportunidad pa reuni cu Eerste Kamer. Prome Minister a splica cu e ta hopi importante, apesar cu e tin un Minister Plenipotenciario, pa repersente, pa e tambe por ta presente den e reunionnan aki, de bes en cuando.

   Miembronan di Eerste Kamer ta esnan cu ta tuma decisionnan hopi importante pa Aruba, y mirando cu tin miembronan nobo, Prome Minister a mira e necesidad pa reuni cu nan pa asina siña conoce nan, y duna nan un presentacion, cu informacion valido di pais Aruba.

  (1) Elogio: Premier Wever-Croes a splica cu durante e reunion aki, 3 punto a resalta. E prome punto ta e elogio grandi cu e miembronan di Eerste Kamer tin pa Aruba na momento cu nan a mira e cifranan macro-economico, di con bon Aruba ta haciendo.

   (2) No ta compronde pakico gobierno hulandes a duna aruba e interes di mas halto: E siguiente punto cu a bin dilanti, ta cu algun di e miembronan, no ta compronde e punto di Gobierno Hulandes, di pakico a duna Aruba e interes di mas halto, mirando cu nunca den pasado, Aruba, a yega di haya un interes asina halto di 6.9%.

   Prome Minister a indica, cu durante e reunion, nan a delibera hopi riba e punto aki. Loke ta hopi positivo ta cu e mesun atardi tabata tin un debate den Eerste Kamer, na unda e fraccionnan di GroenLinks y PvdA, cu awor a uni, y e fraccion di Volt, e Parlamentarionan a trece e punto aki dilanti durante e debate, manera a worde papia mas trempan den e reunion. Pa e motibo aki, e reunionnan cu Eerste Kamer ta importante, paso durante e reunion nan ta haya tur informacion necesario, pa si mester, nan lo por defende e caso.

   (3) Welga di hamber di ex-Prome Minister di Aruba: Lamentablemente, e di tres punto cu a resalta den e reunion aki, tambe a resalta den varios otro reunion, y esaki ta cu ainda nan ta trece riba mesa e welga di hamber di e ex-Prome Minister Mike Eman na 2014. Tambe, nan ta sigui trece dilanti e mal maneho financiero cu tabata tin e tempo ey, ya cu enbes e Gobierno di Gabinete Eman, a tuma su responsabilidad, el a bay haci un welga di hamber cu a bergonsa Aruba.

   "Mi tin cu bisa cu e ta un frustracion, pa ami como Prome Minister, ainda despues di 9 aña, mester scucha esaki, cu ta un berguensa grandi den historia di pais Aruba. E ta kibrabo cierto momento, pero mi sa cu esaki no ta nos Gobierno, pero como gobernantenan responsabel, nos ta para pa pais Aruba, y pa a cosnan bon y cosnan malo, y e punto aki, nos lo atende cune debidamente" Prome Minister a expresa.